Astana qalalyq sotynda 26 jastaǵy Eskendir Súleımenov kóz jumǵan jol apatyna qatysty is boıynsha apelásıalyq alqanyń sheshimi shyqty, dep habarlaıdy Qamshy.kz aqparat agenttigi Sputnik Qazaqstan deregine súıenip. 

"İs materıaldaryn zerdeleı kele, sot alqasy úkimdi ózgerissiz qaldyrýdy sheshti", — dep málimdedi apellsıalyq sheshimdi oqyǵan sýdıa Ásem Ramazanova. 

Sýdıa aýdandyq sottyń sheshimi ádildiktiń barlyq qaǵıdatyna tolyǵymen jaýap beretinin atap ótti. 

Eske sala ketsek, jol apaty 2018 jyldyń 22 maýsymynda Astanadaǵy Máńgilik el – Kereı Jánibek handar kósheleriniń qıylysynda boldy. Qyzylorda oblysy ishki ister departamentiniń bastyǵy, polısıa polkovnıgi Qaırat Muhıtovtiń qyzy Malıka Muhıtova motosıklmen kele jatqan Eskendir Súleımenovti qaǵyp ketti. Belgili aqyn Oljas Súleımenovtiń 26 jastaǵy jıeni oqıǵa ornynda kóz jumdy. 

Qarasha aıynyń ortasynda 29 jastaǵy Malıka Muhıtova QR Qylmystyq kodeksi 345-baby 3-tarmaǵy boıynsha (Jol qozǵalysy nemese kólikti paıdalaný erejeleriniń buzylýynan abaısyzda adam ólimine ákep soqqan áreket) kináli dep tanyldy. Sot úkimimen ol qaýipsizdigi tómen qylmystyq-atqarý júıesi mekemesinde jazasyn óteýmen eki jylǵa bas bostandyǵynan aıyryldy.

Keıinirek sottalýshynyń advokaty Dmıtrıı Kýráchenko sot úkimine shaǵym túsirdi. Apelásıalyq shaǵym boıynsha sýdıa Ásem Ramazanovanyń tóraǵalyǵymen úsh sot otyrysy ótti. 

Marqumnyń atasy, belgili aqyn Oljas Súleımenov otbasynyń úlkeni retinde Muhıtovanyń jazasyn jeńildetý týraly ótinishpen sotqa eki ret júgindi. Alaıda Súleımenovtiń eki haty da is materıaldaryna jeke adamnyń pikiri retinde qosyldy. Jas jigittiń ata-anasy sottan úkimdi ózgerissiz qaldyrýdy surady.