Besinshi kún qatarynan Ońtústik Koreıany qoıý tútin basty. Tumandy tútin jol qozǵalysyna kedergi bolyp, aýanyń lastaný deńgeıi kúnnen kúnge artty. 15 qańtar kúni lastaný kórsetkishi eki esege ósip, bir tekshemetr aýmaqqa 153 mıkrogrammdy qurady. Aıta keteıik, lastanýdyń qaýipti kórsetkishi tekshemetrine 76 mıkrogramdy quraıdy.

Al Seýlde aýanyń lastaný deńgeıiniń táýliktik normasy 118 mıkrogramǵa deıin jetken. Bul 2015 jyldan beri tirkelgen eń joǵarǵy kórsetkish bolyp otyr.

Osyǵan baılanysty Ońtústik Koreıanyń 10 úlken megapolısiniń basshylyǵy qaýiptilikti seıiltý sharalaryn qolǵa aldy. Basshylyq qalalardaǵy kólik qozǵalysyna shekteý qoıyp, óndiris oryndarynyń jumysyn ýaqytsha toqtatty.

Turǵyndar qazir tútindi aýanyń saldarynan densaýlyǵy nasharlaǵanyn aıtyp shaǵymdanýda, olar tipti kúni boıy kóshege shyqpaı, úıde qalýdy jón sanap otyr.

Ekologıalyq zertteý ınstıtýtynyń mamandary mundaı shańdy tumannyń paıda bolýyna aýa-raıynyń ózgerýi áser etken dep boljam jasady. Olardyń aıtýynsha, Qytaıdan kelgen aýa aǵyny las shań-tozańmen ulasqan bolýy kerek.

Seýl qalasynyń meri Park Vonsýn Ońtústik Koreıaǵa kelgen las aýanyń 50-60%-ǵa jýyq mólsheri Qytaıdan kelgenin dáleldeıtin laboratorıalyq zertteý qorytyndysy baryn aıtty.

Sınoptıkter áli de birneshe kún tútin búkil el boıynsha saqtalady dep habarlady.

Aýanyń lastanýy búgingi tańda eshkimdi tańqaldyrmaıtyny ras. Endi  Ońtústik Koreıadan ózimizdiń Ońtúsik astanaǵa aýyssaq. Qarasha aıynda Almatydaǵy aýanyń lastaný deńgeıi 344 mıkrogramǵa jetken. Bul – Seýldegi kórsetkishten úsh ese, qaýiptilik deńgeıinen 5 ese joǵary. Sol kezdegi qala belsendileri qaqqan dabyl joǵarydaǵylarǵa áli jetpegen sıaqty. Al halyqtyń qoıý tútindi jutyp, túk bolmaǵandaı júre beretin ımýnıteti qalyptasyp úlgergendeı. Seýl bıligi bas-aıaǵy bes kúnde iri ónerkásipterdiń jumysyn ýaqytsha toqtatyp, laboratorıalyq zertteý júrgizip, tipti las aýanyń oshaǵyn da anyqtap qoıǵan. 

Airkaz.org saıtyna kirip, Almaty aýasynyń lastaný kartasyn kórýge bolady.

Saıttyń derekterine kóz júgirtsek, búgingi kúnniń ózinde Seıfýllın, Dýlatov kóshelerindegi aýanyń lastaný deńgeıi 235 mıkrogramǵa jetken.

Al Seýldi sergeldeńge salǵan 118 mıkrogram ekenin taǵy da esterińizge salaıyq.