Qazaqstan Respýblıkasynyń Joǵarǵy soty «Arqankergen» oqıǵasyna qatysty isti qaıta qaraý týraly ótinishti talqylady, dep habarlaıdy Qamshy.kz aqparat agenttigi  informburo.kz saıtynyń málimetterine súıenip. Chelah sottan úkimdi alyp tastaý men óz quqynyń taptalǵany úshin 30 mıllıon teńge ótemaqy tóleýdi talap etti. 

Ol sottyń birinshi satysynda ózin qorǵaý isinde jeke quqy taptalǵanyn aıtyp shaǵymdandy. Joǵarǵy sot kasasıalyq satyda ony ómir boıy bas bostandyǵynan aıyrý jazasyna qatysty úkimdi qaıta qaraýǵa kirisip ketti.
«BUU Komıteti Qazaqstan Respýblıkasy sottalǵan Chelahqa qatysty «Azamattyq jáne saıası quqyqtar týraly» Halyqaralyq paktiniń 14-babyn buzǵan dep sheshti, bul týraly BUU Komıteti QR Bas prokýratýrasyna Qazaqstan Vladıslav Chelahqtyń quqyn tıimdi qorǵaýdy uıymdastyrýǵa mindetti ekenin eskertken», - dedi advokat Gúlmıra Shaldyqova sot otyrysynda.
Bas prokýratýra habarlamadan keıin Chelahqa sotqa júginýdi usyndy. Ol Joǵarǵy sottan birinshi satydaǵy sottyń úkimin qaıta qarap, qylmystyq isti qosymsha tergeýge jiberýge jáne qylmystyq izge túsý organdarynyń quqyqtardy buza otyryp alǵan is-qujattaryn joqqa shyǵarýyn surady..

«Vladıslav Chelahtyń quqyqtary buzylǵany úshin oǵan 30 mıllıon teńge kóleminde ótemaqy tóleýdi talap etemin. Chelahtyń Joǵarǵy sotqa jazǵan shaǵymdarynyń tolyqtaı zańǵa saı ekenin rastaımyn. Onyń shaǵymyn qanaǵattandyrýlaryńyzdy suraımyn»,- dedi advokat óz sózinde.

Prokýror Marat Nýrmýhamedov Chelahqa taǵylǵan aıyp pen shyǵarylǵan úkim tolyqtaı zańǵa saı  ekenin aıtty.  Sondaı-aq, oǵan qatysty shyǵarylǵan úkim oqıǵa ornynan alynǵan dálelderge, qazaqstandyq jáne nemis sarapshylarynyń qatysýymen júrgizilgen sot-medısınalyq saraptamasynyń qorytyndysyna, Chelahtyń qasyndaǵy adamǵa óz aýzymen aıtqan áńgimesine baılanysty aıǵaqtarǵa saı oryndaldy. Al tergeý isi kezinde Chelahqa eshqandaı qysym kórsetilmegenin eskertti.

♦22 qańtarda Joǵarǵy sot Chelahtyń isin qaıta qaraıdy

Esterińizge sala keteıik, osy jyldyń 18 qańtarynda ómir boıyna bas bostandyǵynan aıyrylǵan Vladıslav Chelah QR Joǵarǵy Sotyna óz isin qaıta qaraýǵa ótinish bergen bolatyn.

Chelah 2012 jyldyń mamyrynda Almaty oblysy mańyndaǵy «Arqankergen» shekara beketinde 14 shekarashy sarbazdy atyp salyp, kazarmany órtep, oqıǵa ornynan qashyp ketkeni belgili. Jeltoqsan aıynda Vladıslav Chelahqa ómir boıyna bas bostandyǵynan aıyrý jazasyn kesti. 

2017 jyldyń 7 qarashasynda BUU-nyń Adam quqyqtary jónindegi Komıteti Vladıslav Chelahtyń kináli, ne kinásiz ekenine qaramastan, sot barysynda oǵan qysym kórsetilgenin moıyndaǵan bolatyn.