TMD keńistigi anda-sanda tolqyp qoıady. Keshe Ázerbaıjanda narazylyq sharasy ótti. 10 myńdaǵan adam kóshege shyqty. Talap – bireý, bılikti synaǵan bloger 26 jastaǵy Mehman Gýseınovty bostandyqqa shyǵarý. Osyǵan qatysty  26 qańtar kúni ázerbaıjandar taǵy da alańǵa shyqpaq. Búgin..

Belarýs opozısıasy kóshege shyqpasa da, el prezıdenti Aleksandr Lýkashenkoǵa talap qoıdy. «Gramada» opozısıalyq demokratıalyq partıasynyń tóraǵasy Igor Borısov Reseımen odaqtyq kelisimshartty birjola úzýdi talap etti. Munyń sebebi nede? Opozısıa lıderiniń aıtýynsha, "mundaı qadam oryn alǵan jaǵdaıda Reseı bizdi jutyp qoıady".

"Reseımen biriksek, táýelsizdigimizdi joıamyz" dep júrgen opozısıa lıderi Igor Borısov "orystarmen odaqtyq kelisimsharttyń túkke keregi joq" dep esepteıdi.

–Jer aýmaǵy jaǵynan Belorýssıadan 82 ese úlken, halqynyń sany jóninen 15 ese, al jalpy ishki ónimi turǵysynan 27 ese úlken Reseımen odaqtyq kelisimshart jasaý múmkin emes. Mundaı jaǵdaıda biz egemendigimiz ben táýelsizdigimizden múlde aırylamyz,–deıdi «Gramada» opozısıalyq demokratıalyq partıasynyń tóraǵasy Igor Borısov.

Igor Borısovtyń pikirine sensek, odaqtyq kelisimshart belarýs ultynyń múddesine, el Konstıtýsıasynyń birqatar baptaryna qaıshy keledi. Mundaı jaǵdaıda birikken memlekettik basqarý qurylymdaryn, biryńǵaı áskerı qarýly kúshter men ortaq valúta qurý múmkin emes.  Onyń ústine Belarýs pen Reseı arasynda daýly terıtorıalar bar. Munyń barlyǵy túıindi kúıinde qalyp otyr. Ony da tezirek sheshý kerek, áıtpese, Ýkraınadaǵydaı jaǵdaı oryn alady».

Aqıqatyn aıtar bolsaq, eldiń birqatar opozısıalyq belsendileri Belarýs memleketiniń Reseımen emes, eýropalyq baǵyt alǵanyn qalap otyr. Biraq olar EýroOdaqqa kirýdi Ýkraınadaǵydaı birjaqty sıpatta emes, evolúsıalyq  jolmen birtindep sheshýdi qarastyryp jatqan sekildi.