Osydan birneshe saǵat buryn áleýmettik jelide álimjettik jasaǵan oqýshylar týraly beınekórinis taraǵany belgili. Osyǵan baılanysty Túrkistan qalasyndaǵy mektep oqýshylarynyń álimjettik máseleleri boıynsha qalalyq bilim bólimi arnaıy brıfıń ótkizdi. Atalmysh brıfıńke Túrkistan qalalyq bilim bóliminiń basshysy Aqmaral Batyrbekova, oblystyq İshki ister departamenti tergeý bóliminiń basshysy Bolat Elmurzaev jáne qalalyq ardagerler keńesiniń tóraǵasy Jarqynbek Qulbaıymbetov qatysty. Bul týraly Túrkistan qalalyq ákiminiń baspasóz qyzmeti aqparat taratty.
–Búgin áleýmettik jelide taraǵan mektep oqýshylarynyń arasyndaǵy álimjettik barlyǵymyz úshin kútpegen jaǵdaı bolyp otyr. Tóbeleske qatysýshylary tolyq anyqtalyp, polısıa tarapynan tergeý jumystary bastalyp ketti. Oqıǵa qalamyzdaǵy mekteptiń 9-synyp oqýshylary arasynda sabaqtan tys ýaqytta ótken. Iaǵnı keshki saǵat 17:00-ler shamasynda oryn alyp otyr. Orynsyz jaıdyń aldyn alýǵa jumys jasamaǵan adamdardyń tártiptik jaýapkershiligi qaralady. Tergeý barysynda ata-analardyń, mektep basshylarynyń jáne ıývenaldy polısıa tobynyń jaýapkershilikteri qaralýda, –dedi Aqmaral Batyrbekova.
Atalǵan jaıt, oblystyq bilim basqarmasynyń, oblystyq Polısıa departamentiniń qatań baqylaýynda.
–Qazirgi tańda Túrkistan qalalyq polısıa basqarmasy, qalalyq bilim bólimi Túrkistan qalasynyń úsh mektebiniń 9-synyp oqýshylary arasyndaǵy quqyqbuzýshylyq áreketter jasaǵanyn anyqtap, tergeý jumystary júrgizilýde. Mán-jaıy qosymsha habarlanady. Bul iske baılanysty jábirlenýshilerdiń densaýlyqtary qalypty, sabaqqa turaqty qatysýda, –dep habarlady Túrkistan qalalyq ákiminiń baspasóz qyzmeti.
Sonymen qatar, ákimshilktiń baspasóz qyzmeti «Quqyqbuzýshylyqqa qatysty qozǵalǵan isti Túrkistan oblystyq ishki ister departamenti tikeleı ózine aldy. Jaýapkershilikten mektep, mekeme jetekshileri jáne ata-analar da tys qalmaıdy. Bastysy kúsh qoldanylǵan oqýshylar din aman, sabaqqa qatysýda. Qatygezdikti kórsetetin mundaı vıdeolardy taratpaǵandaryńyz oryndy bolady» degen aqparat taratty.
Bul oqıǵaǵa qatysty İshki ister mınıstrligi de jaýap qatty.
–«Buzaqylyq áreketke qatysýshylarynyń barlyǵy anyqtaldy. Qazirgi ýaqytta QR QK 293-baby 2- tarmaǵynda qarastyrylǵan qylmys belgileri boıynsha sotqa deıingi tergeý amaldary júrgizilýde", - dedi İshki ister mınıstrliginiń resmı ókili.
