Depýtat óńirlerdegi salyq organdary ǵımarattaryn keńeıtip, salyq tóleýshilerdi qabyldaıtyn bólmeler jasaýmen álek bolyp júrgenin aıtty.
Májilis depýtaty Omarhan Óksikbaev jaýapty adamdardan qarjy mınıstrligine sıfrlandyrýǵa bólingen qarjynyń qaıda jumsalǵanyn suraýdy usyndy, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp.
Depýtattyń aıtýynsha, qarjy mınıstrligine sıfrlandyrý úshin memleketten orasan zor qarjy bólingen. Alaıda atqarylmaǵan is áli de kóp.
"1999 jyldan 2018 jylǵa deıin qarjy mınıstrligine, onyń keden, qazynashylyq, salyq organdaryn sıfrlandyrý úshin respýblıkalyq búdjettiń ǵana ózinen 78,5 mıllıard teńge bólingen. Ony dollarǵa shaqqanda jarty mıllıard dollar. Bul aqshaǵa avtomattandyrýdy ǵana emes, basqa da alǵy sheptiń barlyǵyn engizýge bolatyn shyǵar dep oılaımyn. Al búgin mınıstrdiń sózine qaraǵanda istelmegen jumys áli bastan asady. Sonda osy aqshanyń bári qaıda ketti? Ne engizdik sonda? Búgingi baıandalǵan osy deńgeı sol qarjyǵa turarlyq dúnıe me?", — dep ashýlandy Óksikbaev májilistegi úkimet saǵatynda.
Májilismen memleketten bólingen qarjynyń qaıda jumsalǵanyn tekserýdi usyndy.
"Osyny tekseretin kez kelgen sıaqty. Jaýapty adamdardan jaýabyn suraýymyz kerek", — dedi ol.
Depýtat óńirlerge saparmen barǵan kezde, salyq organdarynyń ǵımaratty keńeıtip, salyq tóleýshilerdi qabyldaıtyn bólmeler jasaýmen álek bolyp júrgenin aıtty.
"Aınalaıyn-aý, damyǵan memleketterde salyq tóleýshi salyq organynyń qaıda ekenin bilmeıdi. Salyq organynyń esigin ashpaıdy da, biz soǵan umtylýymyz kerek. Soǵan jetýimiz kerek. Nege biz ǵımaratty keńeıtip, azamattardy qabyldaıtyn organ jasaımyz? Ol orynnyń keregi de joq, salyq tóleýshi men salyq organynyń qarym-qatynasy elektrondy júıede, qashyqtyqta júzege asyrylýy kerek", — deıdi Óksikbaev.
Ol Esil aýdanynyń salyq organyna barǵan kezde, ózi kýá bolǵan kórinisti baıandap berdi.
"Salyq tóleýshilerdiń salyq organynda qara ter bolyp júgirip, esep beretin ýaqytynda baryp kórińizshi. Men ózim Esil aýdanynyń salyq organynda bir ret boldym. Sol jerde tentirep júrgen adamdardy kóresiz. Jemqorlyq degen sol jerde jatyr. Osynyń bárin jabatyn kezimiz kelgen sıaqty", — dedi májilis depýtaty.
Sondaı-aq, Óksikbaev úkimettik organdar arasynda túsinbeýshilik bar ekenin atap ótti.
"Ótken joly aqparat mınıstrimiz Qazaqstandy ınternetpen tolyq tek 2025 jyly ǵana qamtamasyz etemiz dep aıtty. Olaı bolsa, sizder qalaı jalpylama deklarasıaǵa kóshe alasyzdar? Kóshe almaısyzdar, sebebi ınternet joq. Úkimettik organdar arasynda tolyq kelisimmen, zańdy túrde iske asatyn tetikterdiń barlyǵy jasalmaǵan sıaqty, men osyǵan kóńil aýdarǵym keledi", — dedi ol.
