Aqtóbede mektep oqýshysy Mırasbek Dáýletıar pyshaq jaraqatynan kóz jumdy. Qylmystyq is qozǵalyp, 2002 jyly týǵan taǵy bir mektep oqýshysy óz kinásin moıyndady, dep habarlaıdy Qamshy.kz aqparat agenttigi QazAqparatqa silteme jasap.

Aqtóbe oblysy, Shalqar qalasynda mektep oqýshysy aýrýhananyń jansaqtaý bóliminde kóz jumdy.  Dárigerler qan kóp ketkenin, ómirin saqtap qalý múmkin bolmaǵanyn aıtty. Al búgin oblystyq polısıa departamentiniń baspasóz qyzmeti qylmystyq is qozǵalǵanyn málimdedi.

«26 qańtar kúni aýdandyq aýrýhanaǵa 16 jastaǵy jasóspirim pyshaq jaraqatymen jetkizildi. Ol keýde tusynan alǵan jaraqattan sol kúni kóz jumdy. Kúdikti retinde Shalqar qalasynyń 17 jastaǵy turǵyny ustaldy. Ol óz kinásin moıyndady. Qazir Qylmystyq kodekstiń «Adam óltirý» baby boıynsha tergeý júrip jatyr. Kúdikti ýaqytsha tergeý ızolátoryna qamaldy, - dep habarlady oblystyq polısıa departamentiniń baspasóz qyzmeti.

Al qaza bolǵan Mırasbek Dáýletıar oqyǵan mektep dırektory Alıa Ospanovanyń aıtýynsha, oqıǵa 26 qańtar kúni saǵat 19:00 shamasynda bolǵan. Shalqar kólindegi muz aıdynynda oqýshylar top bolyp, tóbelesken.

«Eki mekteptiń oqýshylary arasynda tóbeles bolǵan. Sóz kótere almaǵan sıaqty. №6 orta mekteptiń 10 synyp oqýshysy qaltasyndaǵy pyshaqty suǵyp alǵan. Bizdiń mekteptiń oqýshysy reanımasıalyq ústelde kóz jumdy», - dedi İ.Úrgenishbaev atyndaǵy orta mektep dırektory Alıa Ospanova. Qaıtys bolǵan Mırasbek Dáýletıar bokspen shuǵyldanyp, júldeli oryndardan kórinip júrgen. 

Usynǵan: Nazerke Labıhan