Dımash týraly byqsyǵan áńgime kóbeıip ketti. Erinbegenniń bári aıtyp qalyp jatyr. Quddy bir sol balaǵa álemdik dańqty ózderi alyp bergendeı...
Keıbir jýrnalshy baýyrlarymyz da bildirmegensip otty kósep-kósep qoıady.
Anaý jyly balanyń barıton daýsynan habary joq bireýleri "seniń aıǵaılaǵan áıel daýysyń unamaıdy" dep bolashaǵyna balta shappaq bolǵan. Endi mine, kótere almaıtyn shoqpardy beline baılap, eldi dúrliktirip, Dımashtan "saýǵa" surap júr. Áńgimeleriniń esh qısyny joq. Aıaýlysynyń janynda aıfonyn shuqylap otyryp, saıasat soǵatyndaryn qaıtersiń?!
"Halyqaralyq daýdy nege sheship bermeıdi" dep kókıtinderi kókeıge qonbaıdy. Negizi, qazaq pen qytaı arasyndaǵy kúrdeli de kúrmeýli máselelerge ataq-dáreje emes, avtorıtetter ǵana jón aıta alady. Mysaly, sonaý jyly Máskeýdegi úlken teatrda sheshen jankeshtileri júzdegen adamdy kepilge ustaǵany esimizde. Sonda eshkimniń batyly barmaǵan ajaldyń aranyna KSRO halyq ártisi Iosıf Kobzon bardy. Sońynan Kobzon marqum Alla Pýgachevaǵa: "Sen nege osynsha bedelińmen qoǵamdaǵy problemalarǵa aralasyp, óz pikirińdi aıtpaısyń" dep renjip sóılegeni bar. Aıtpaqshy, ondaı deńgeıdegi adamdar Qazaqstanda da jeterlik qoı. Mysaly, KSRO halyq ártisi Tólegenova, QR Halyq ártisi Rymbaeva apaılaryńnyń halyqaralyq bedeli Dımashtan tómen be?
♦Dımash Qytaıda qysym kórgen qazaqtar jaıly: Meniń de janym aýyrady (vıdeo)
Osyndaı ardaqty, talantty, bedeldi apa, aǵalaryńa syn saǵatta "ult úshin mańyzdy bir máseleni qoldasańyz" deýge bolmas pa?!
Joq, ataǵynan at úrketin, abyroı-dáýletin atan túıe kótere almaıtyn aǵalary úkimette, parlamentte otyrǵan bázbireýler aýyl-úıdiń qoı tóbetinshe úrip, Dımashtaı jas bóriniń baltyrynan bir tistep qalýǵa baryn salyp jatyr...
Keshe qoldamaǵandar búgin qorlaýǵa bar. Qorqaýlyq emeı, nemene?!
Keshe qazaqty Borattar kemsitkende, osy jatypatarlardyń bireýi sóz taýyp aqtaı alýǵa jarap pa ediń?!
Sol qazaqtyń qandaı aqsúıek, daryndy ult ekendigin kúlli dúnıege moıyndatyp, alty qurlyqtyń er-qatynyna bas ıdirtip, kóz jasyn kól etken Dımash syndy oǵlandy myń qazaqtyń ornyna qımas edim. Ári-beriden soń Qytaıdyń ózinde týyp ósken, ol jerdegi qandastardyń problemasyn da, Qytaı saıasatyn da bir kisideı jaqsy biletin ataǵy jer jarǵan óner, sport tarlandary da jeterlik qoı! Álde olardan suraýǵa bolmaı ma?
Qysqasy, kóńilde túıtkil bolǵan osy saýaldardyń jaýabyn taba almadym...
Bu qazaqtyń tili aýzyńa syımaǵan "kóp pysyǵyn" jónge salar bir aqylman kisi joq pa aramyzda...
Aý, aǵaıyn, ádilet qaıda?
Serikbaı Qylyshbaıdyń feısbýk paraqshasynan alynǵan
