Sholpan Elgezekova jaıly eshteńe bilmeıtinmin. Sońǵy túsken telehıkaıasyndaǵy obrazyna súısinip, «Qandaı ǵajap áıel!» dep tańdaı qaqtym da, qoıdym. «Elgezekovany jol apatynan qaıtys boldy» degende ǵana ony tanı bastadym. Qazaq kınosy qandaı sheber aktrısasynan aırylǵanyn sonda bir-aq bildim. Sholpan qaza bolǵannan keıin onyń aty atalǵan jerdiń bárinde «Shabdaly» kórkem fılmi de qosa aıtylyp júrdi. Aldymen fılmniń ataýy qyzyqtyrdy. Osy kıno arqyly aktrısany da tanyǵym kelip, bir túnde bir demmen kórip shyqtym.

Qostanaıda 2 jyl ómir súrip, Jetisaıdyń da betashar toıyna qatysyp kórgen men bul fılmniń shynaıy ómirdi dál kórsete alǵanyna shúbá keltirmeımin. «Shymkenttiń jigitine turmysqa shyqpaý kerek», «Dıplomdy alǵannan keıin erterek jumysqa ornalasý kerek», «Jumysqa ornalasý úshin mindetti túrde tanys tabý kerek», «Qyzdy tanıtyn, tekti jerdiń jigitine turmysqa berý qajet», «Toıdy dúrkiretip jasaý kerek», «Oqyǵan qyzǵa kóbirek qalyń mal tóleý kerek», «Shymkenttikter kelindi qulsha jumsaıdy», degen sıaqty qazirgi zamannyń qatyp qalǵan qaǵıdalary men qazaqtyń boıyna ábden sińgen ártúrli ádetterin ádemi beınelegen eken.

Fılmniń jelisi jeńil de, kúrdeli de emes. Ataýy da erekshe. Ádette qazaq kıno túsirse «Ómir máni», «Kóńil sáni», «Júrek jyry», «Sezim syry» degen shablondardy tańdaı salmaýshy ma edi?.. Bul jolǵy ataý ózgerek.

Elgezekova fılmniń sátti kadrlary úshin balshyq pen shalshyqqa batty. San túrli kúıge tústi, birde jylady, birde ashýǵa mindi. Oı, Alla-aı, ne degen emosıaǵa baı! Ol soltústiktiń salqyndaý kózqarastaǵy mentalıtetin dál berip, prokýrordyń zaıybynyń minez-qulqyn jaqsy beınelegen.

Qysqasy, fılmniń ón boıynda bári bar: mahabbat, ósıet, qurmet, ıman, syılastyq, qanaǵatshyldyq, senim, qarapaıymdylyq, eńbek, baýyrmashyldyq, adamgershilik, qonaqjaılylyq.

Qazaq kınosy sapaly bir fılmmen tolyqqan eken. ...Kıno bar, biraq endi Elgezekova joq. «Shabdaly» Sholpanǵa arnap jazylǵan sekildi kórindi maǵan nemese Sholpan «Shabdaly» úshin týǵandaı.

Aqerke Ábilhan