Japonıada týýdyń tómendeýi men jumys kúshiniń azaıýyna baılanysty eńbek qajettiligin qanaǵattandyrý úshin robottardy qoldanýǵa májbúr. Ǵalymdar qurylys ındýstrıasyndaǵy adamdardy almastyratyn gýmanoıdtyq robot oılap tapty dep habarlaıdy Qamshy.kz aqparat agenttigi geek.com portalynyń deregin negizge ala otyryp. 

Aıta keter bolsaq, Advanced Industrial Science and Technology (AIST)  ulttyq ınstıtýty HRP-5P qurylysshy robot qurastyrdy.  Ol óziniń alty fýttyq bıiktigimen eski ǵylymı-fantastıkalyq fılmderden únemi búlik shyǵaryp, ıelerin óltirýge tyrysatyn qyńyr monstrlardyń bireýine uqsaıdy.

Ataýynan kórinip turǵandaı, bul - androıdterdiń uzyn jelisiniń besinshi modeli. 1998 jyly alǵash ret shyqqan HRP-1 Japonıanyń bolashaq robototehnıkalyq ekonomıkasynyń bastamasy boldy.

  HRP-5P eń jańa jáne eń ozyq qurylǵy bolsa da, burynǵy modelderi áli kúnge qoldanylýda. Japonıa 2015 jyly HRP-2 robotyn halyqaralyq DARPA Robotics baıqaýynda tanystyrǵan.

  Japonnyń jańa roboty qurylysshylar úshin úlken ózgeris ákelýde. Derekke júginsek, bolashaqta turǵyn úıdiń qurylysyn robottar salatyn bolady. 20 jyl ishinde AIST barlyq jumys túrin adamnyń kómeginsiz isteı alatyn osyndaı robottar jasaýdy josparlaýda.

  Eski modeldegi gýmanoıdty robottar názik tapsyrmalardy oryndaı alsa da, qıyn jumysqa kelgende adamnyń fızıkalyq múmkindikterin oryndaı almaıdy. 

Al AIST  HRP-5P-ni qurý arqyly bul máseleni sheshti, olar adammen birdeı tipti artyq fızıkalyq múmkindikteri bar mamandandyrylǵan qurylysshy robot  jasady .

Bir qaraǵanda, jańa robot tańǵalarlyqtaı emes. Ol adamǵa qaraǵanda baıaý qozǵalady. Alaıda, onyń elektrondy mıy adammen birdeı kúsh jumsap, tipti odan da jaqsy jumys isteı alady. Sondaı-aq, adamdar sharshaıtyn bolsa, bul robot  kúni-túni toqtamaı jumys isteı beredi.

AIST ınstıtýty osylaı Japonıadaǵy jumys kúshiniń jetispeýshiliginen týyndaıtyn ekonomıkalyq qıyndyqtardyń aldyn almaq. Mundaı jaǵdaıda eń aldymen qurylystyń  zardap shegetini anyq.

Sonymen qatar, zertteýshiler osy arqyly qaýipti jerlerde jumys isteıtin adamdardyń jazataıym oqıǵalarǵa ushyrap, kóz jumýyn azaıtýdy qalaıdy. Qurylysshylar aýyr tehnıkany qoldanyp, kólemdi materıaldardy kótergendikten dene  jaraqatyn kóp alady. Zertteý ınstıtýty osy qıyndyqtarǵa eń durys sheshim sońǵy tehnologıalardy qoldana otyryp, gýmanoıdtyq robottardy jasaý bolyp tabylatynyn aıtady. Bul mashınalar adamdardy qurylys alańdarynda jáne basqa qaýipti ortalarda aýystyra alady.

Gýmanoıdty robottar organıkalyq túrde jumys isteıdi. Osylaısha olar eshkimge kedergi keltirmesten jumys ortasyna sińisip ketýi múmkin.