Astanadaǵy órt bolǵan úıge barǵan 24.kz tilshisi Aslan Qajenov óziniń Facebook-tegi paraqshasyna órtke oranǵan "vremánkanyń" kúıin jazypty. Órttiń sebepterin de boljap kórdi dep jazady Qamshy.kz aqparat agenttigi.   

♦«5 balanyń ólimi seniń moınyńda, Madına Ábilqasymova!»

"Órt bolǵan jerge 09:48-de jettik. Balalardyń kereýeti, arbasy, kıimderi men oıynshyqtardyń qaldyqtaryn kórip, selk ete tústim. Jantúrshigerlik jaǵdaı. Aýyr qaıǵy. Emosıaǵa berilip turatyn jaǵdaı joq, tez es jınap, 09:50-de tikeleı efırge qosyldyq.

Artynan kórshi-kólem men týǵan-týystaryn sózge tartyp kórdim. Kameradan seskenedi. Ońashada áńgimege ashyq. Sonymen, belgili bolǵany, qaıtys bolǵandardyń barlyǵy da qyz bala eken. Úlkeni 12-de. Artyndaǵy sińlilerine bas-kóz bolyp júrgeni de sol. Ákesi jaqyn jerdegi STO-da qyzmet etedi. "Anasy da jýyrda ǵana jumysqa shyqqan" deıdi. Biz barǵan kezde olar bolmady. Ol túsinikti de. Kýágerlerdiń aıtýynsha, órt 10-aq mınýtta lap berip, barlyq aýmaqty sharpyp úlgergen. Alǵashqyda aınalasyndaǵylar óz betinshe sóndirýge tyrysypty. Sý ákelip shashqan, taǵysyn taǵy. Tipti, bir azamat úıge kirip, balalardy qutqarýǵa tyrysqan. Kók tútin, túk kórinbeıdi, "jerdi sıpalaǵanda qımyldaǵan jan joq" deıdi. Qoly men betin kúıik shalǵan.

Búldirshinder ana dúnıege uıyqtap jatqanda ketip qalsa kerek. Úıden shyǵýǵa tyrysyp, jantalasqan áreketteri baıqalmaıdy. "Uıyqtaǵan jerinde jatyr" deıdi órt kezinde bolǵandar. Esik qulyptalmaǵan. Óıtkeni, dárethana dalada.

Qaıǵy jutqan otbasynyń turǵan jeri alaqandaı ǵana. 30 sharshy metr. Osy aýmaqta 7 adam tamaq pisirgen, kirlerin jýǵan, uıyqtaǵan degendeı. Al, endi sebebine qatysty: vremánka peshpen jylytylǵan. Iaǵnı, kúndelikti ot jaǵylady. Buǵan qosa, elektrli pesh te qoldanǵan eken. Onyń qaldyqtaryn óz kózimizben kórdik. Sonymen qatar, úıdiń qabyrǵalary tez tutanǵysh materıalmen (penoplast) qaptalǵan. Taǵy bir boljam - toqtyń tuıyqtalýynan bolýy múmkin. Bul kýágerlerdiń aýzynan alynǵan aqparattar. Al, naqty sebebi áli resmı shyqqan joq.

Muny tizbelep otyrǵanym, qazir áleýmettik jelilerde ártúrli jazbalar jarıalanyp, tipti, keıbiri qatty burmalanyp ta ketip jatyr. Osy turǵyda oqıǵa ornynda bolǵan, órt saldaryn kórgen, kýágerlerimen sóılesken tilshi retinde osy bilgenderimmen bólisýge moraldyq quqym bar esepteımin".

♦Tirideı órtenip ketken 5 balanyń úlkeni Albınanyń haty...

♦Bes sábıdiń muń zary. "Biz Sizderdi kútemiz. Qosh, ákeshim, qosh, ana!"

Usynǵan: Gúlim Jaqan