Astanada jeke úılerdiń birinde bolǵan joıqyn órt saldarynan 5 bala qaza tapty. Búkil jurtshylyqty eseńgiretken jantúrshigerlik oqıǵaǵa baılanysty áleýmettik jeli qoldanýshylary túrlishe pikir bildirip, qaıǵyly jaǵdaıǵa tap bolǵan ata-anaǵa kóńil aıtyp jatyr.

Qamshy.kz aqparat agenttigi áleýmettik jelide qyzý talqyǵa túsken qazaly oqıǵaǵa baılanysty aıtylǵan pikirlerdiń bir shoǵyryn nazarlaryńyzǵa usynady.

Halıma Tájiqul: «Bes balanyń ólimi týraly baıqap jazyńyzdarshy, áke-shesheni kinálaýdan aýlaq bolaıyqshy, jaraǵa tuz sepkennen ne utasyzdar? Dám-tuz taýsylsa, qabyrǵa da qulaıdy dep jubatatyn jurt emespiz be? Qudaı esirkesin... Álgi alaýlatqan-jalaýlatqan jylymyzdyń osyndaı qaıǵymen jalǵasyp jatqanyna jastardy baspanamen qamtı almaı otyrǵan ákim-qaralar kináli, astanaǵa kelip jatqan jas otbasylardyń esebin júrgize almaı otyrǵan quzyrly oryndar kináli, bári bir kúndik qyzmettiń qyzyǵyn oılap, jas pen balanyń múddesin oıdan shyǵaryp alǵan, qas qylǵanda. Qaıda, qaı mekemege barsań, jylmań etip qaltańdy qaǵyp qalýdy oılap otyrǵan jylmaqaılar... Ondaı jerde konteıner turmaq, áıbat ǵımaratyńnyń da shańyraǵy ortasyna túsedi».

Dáýlet Serikbaı: «Bala 2 jasqa tolǵansha, 50-60 myń járdemaqy tólenýin talap etýimiz kerek. Sonda analar úıinde otyrar edi, balasy da anasynyń qushaǵynda emip óser edi. Tym qurysa, 2 jyl jaǵdaıyn jasaı almaǵan bılikten ne qaıyr. 3 aılyq balany tastap jumysqa shyǵý ne sumdyq? Karera qýyp jumysqa shyqpaǵany anyq. "Jetpegesin, balalaryna nan taýyp berem" dep shyqty jumysqa.

Qajet bolsa, analar mınıstrliktiń aldyna sherýge shyqsyn. Únsiz qalmańyzdar. Óz halqynan aıap, óz halqyn jarytpaı otyrǵan úkimet ketsin. Balalardy anasynan, analardy balalarynan aıyrǵan úkimet qajet emes. Balalardyń obaly úkimettiń moınynda».

"Jalǵyz adamdyq pıketke shyǵýym múmkin. Mınıstrlikten bala 2 jasqa tolǵansha 60-70 myń teńge járdemaqy tóleýin talap etemin. Balam joq, biraq beıkúná ini-qaryndastarymnyń ystyq ottan ólýin emes, anasynyń ystyq qushaǵynda ósýin qalaımyn. Eshqandaı pıar-mıardy bilmeımin, talap etkim keledi, qolymnan keletini sol ǵana, júregim qan jylap otyr. 2-3 aılyq balany emshekten aıyryp jumysqa shyǵyp júrgen analardy kórip júrmin. Shydamym shegine jetti. Sottasa sottaı bersin, qamasa qamaı bersin. Tym qurysa uıymdasyp mınıstrlikke hat tapsyraıyqshy".

Aıgúl Myńjasar: «5 balasy bar úıde 7 aýyzdy asyraý úshin neshe adam jumys isteý kerek? Árıne, kem degende - 2 adam!

Búgin túnde perishtege aınalǵan 5 balapannyń ata-anasy sonyń qamymen júrdi.

Al 5 bala tapqan anany eń bolmasa, 1 tómengi jalaqy (MZP, 42 500 tg) kóleminde járdemaqymen úıde otyrǵyzýǵa bolmaı ma?

5 bala týǵan áıeldiń 40 myń teńgelik quny joq pa?

Anaý Memlekettik áleýmettik saqtandyrý qory - GFSS-ta 1 trln-nan asa aqsha jınalyp tur. Osy júıeniń qatysýshysy retinde sondaǵy qarajattan 5 jáne odan kóp balasy bar otbasylarǵa aı saıyn 1 aılyq tómengi jalaqy kóleminde járdemaqy taǵaıyndaýdy usynamyn!

Bul áleýmettik saqtandyrý júıesine árbir jumys isteıtin adam úshin jumys berýshi onyń aılyǵynyń 5 paıyzy kóleminde aýdarym jasaıdy. Endi biryńǵaı áleýmettik tólemnen de (ESP) aqsha túsetin bolady. Al saqtandyrý jaǵdaıy jurttyń bárinde birdeı bola bermeıdi. Osylaısha jyl saıyn mıllıardtaǵan aqsha qorda qalyp otyrady.

Jaqsy, zeınetaqy qory árqaısymyzdyń qarttyǵymyz úshin.
Ulttyq qor bolashaq urpaq úshin.
Al áleýmettik saqtandyrý qoryn (GFSS-ty) áleýmettik máselelerdi sheshýge jumsaýǵa bolady ǵoı! Kúıip ketesiń da!»

Gúlnur Imandosova: «Albına, Alına, Elına, Sabına, Baqyt...

5 bala tirideı janyp ketken. Sumdyq-aı. Birin-biri qaraǵan,birine-biri súıeý bolyp, demeý bolyp ósip kele jatqan qoshaqandarynan bir sátte aıyrylǵan ata-ananyń kúıin kóz aldyma elestetý qıyn. Jumysqa ketkende ózderin qaldyryp júrgen eken. Mundaı qanshama otbasy bar. Kúni keshe ǵana Shýchınskide respýblıkalyq balalar olımpıadasyna ulymdy aparyp qaıttym. Bir jalǵyzbasty anamen tanystym.Sondaı jaqsy adam. Qyzy qandaı tárbıeli,tártipti! Anasyn «Anashym» dep erkeletip tur. Biraq, búginde sol 10 jasqa kelgen balanyń kórmegeni joq eken. Anasy jumysqa ketkende 1 jarym jastaǵy bala úıde japadan jalǵyz qalady. Garshogyn,tamaǵyn daıyndap ketedi eken. "Sóıtip jalǵyz qalyp ósti ǵoı" deıdi anasy. Qudaı-aý, elimizde mundaı qıyndyqty basynan ótkizip kele jatqan, jurttyń esigin panalap, torǵaıdyń uıasyndaı sýyq kepeni, temir vagon-konteınerlerdi jalǵa alǵa alyp turyp jatqan qanshama otbasy bar?! Biz ony jaqsy bilemiz, aınalamyzda tolyp júr dep etimiz úırenip ketken. Týra osyndaı qaıǵyly oqıǵa qatty esimde qalypty. KTK-da júrgende túsirip edim. Dachada sheshesimen turatyn 2 kishkentaı bala (3-4 jas) tirideı janyp ketken. Órt shyqqanda qoryqqandarynan bólmedegi temir krovattyń astyna birin-biri qapsyra qushaqtap tyǵylǵan ǵoı. Túsirip júrip baıqadym: balalardyń kúıgen terisi qabyrǵaǵa jabysyp qalǵan. Sumdyq-aı. Túsirilimmen talaı márte morgtarda bolsaq ta selt etpegen júregimiz anaý qabyrǵadaǵy bir shókim kúıgen terige shydaı almady. Áriptesim ekeýmiz jylap jiberdik. Qudaıym-aı, búgingi 5 balapannyń ata-anasyna sabyr bere gór! Kimdi kinálaýdy bilmeısiń... 5 balasy bar otbasy nege páter jaǵalap júrgen eken degim de kelmeıdi. Óıtkeni, bizdiń bılik - ol bizdiń bılik! Mundaı otbasylardy esiginen syǵalatpaıtyn,qajet bolsa mundaı iste ózgeni «spokoıno» aıyptaı salatyn,16 myń teńgege baıyp ketedi dep júrgen beıshara,jaýapsyz bılik!»

Usynǵan: Nazerke Labıhan