Qaptaǵan áleýmettik jelilerdiń biri -feısbýktyń bir tusynda "O chem vy dýmaete?" deıdi. Ne oılasam dep oılap otyrmyn...

         Saıasatty oılaýǵa mıym jetpeıdi. Jetse de, jetpeıdi.

        Halqymdy oılaıyn desem... halqymdy oılaǵan soń, ol oıyńdy iske asyrmasań, tek oılap qana júrgenderdiń sanyn arttyryp ne kerek? Onsyz da olar kóp "qoı". Jáne ol oıyń ózińe emes, halqyńa paıdaly bolmasa, halqymdy oıladym dep birnárse isteý - bekershilik.

         Tabıǵatty, onyń qalaı quryp bara jatqanyn oılasam ba eken álde? Alaıda, úı gúli men aýla gúlinen basqa egip, ósirip kórmegen men tabıǵatty oılap jetistirmespin. Aǵash egip, orman jasamasam da, tym quryǵanda tabıǵatqa zıanym tımese, sol da bolsa paıdam shyǵar.

         Jetim-jesirlerdi oılasam ba eken? Olardy oılap, kórip, bilip, et-júregim ezilip, eshkim joqta eki tamshy kóz jasymdy syǵyp alýdan basqa esh paıdam joq. Basynan sıpap, Alladan amandyqtaryn, adaspaýlaryn tilep, jyly sóz aıtqanym tıtteı de bolsyn sep bolsa, solaı jasaı beremin. Odan aryǵa ázirge dármenim jetpeıdi. Ras sóz.

         Jumysty oılasam ba eken? Nesin oılaımyn biraq. On eki múshem saý bolsa, jumystyń túr-túri bar qazir. Shash tarap, bas ýqalaýshydan bastap, etik súrtýshige deıin. Bir mánisi bolar. Ash qaldyrmas Jaratqan. Barǵa shúkir, joqqa sabyr.

         Ólgenińshe bitpeıtin, saǵyzsha sozylǵan problemalardy oılasam ba eken? Ony oılap qaıtpekpin? Onsyz da olar ózderin oılamaı qalýyńa jol bermes. "Men munda" degendeı arakidik bas kóterip turady. Problemań bar bolsa, ómir súrip jatyrsyń degeni, sirá. Bárimizdiń basymyzda jaqsy-jaman problemalar teń bolyp tura bersin. Buıyrǵan ǵumyrdy súre bereıik... mándi... qumsaǵatymyzdyń qumy taýsylǵansha...

         Anaý bir adamdardy oılasam ba eken. Táıiri, ózimdi oılamaıtyn adamdy oılap, ýaqyt ketirip nem bar, á? Odan da meni de oılaıtyn adamdardy oılap, izdep, kórisip turmaımyn ba? Ázirge eshkimge kereksiz, izdeýsiz qalǵandardyń qatarynda joqpyn, shúkir.

         Ómirdi oılasam jón shyǵar? Áı, biraq ómirdi oılasań da, oılamasań da oıyńda ǵoı. Keýdede júrek soǵyp, tamyrdan qan júgirip turǵanda ómir ózi-aq oıda júredi. Odan da sol ómirdi mándi, paıdaly súrýdi oılaý kerek shyǵar?

         Jurttyń bári qyzyqqan dúnıeni oılasam ba álde? Bálengúldiń shapanyndaı shapan, júzigindeı júzik, kóligindeı kólik bolsa dep... Áı, solar kórime keńdik berip, o dúnıeme medet bolsa, oılaıyn, bolmasa nesin oılaımyn? Shúberektiń qaı túri bolsa da, jylý berip, tánińdi jylytyp tursa, aýyryp qalmasyńa sep bolsa, boldy emes pe? Al Allanyń qaısy quly bolmasyn qaısybir altyn-kúmissiz-aq ádemi emes pe?

         Ólimdi oılaǵanym jón shyǵar... Men onda ne alyp baramyn? Laıyqsyz laıktarymdy ma? Daıyndyǵym qandaı? Ne tirlik qylyp júrmin ózi? Endigi qansha qalǵany belgisiz kúnderimdi áleýmettik jelilerde laık jınaýmen ótkizsem, ne tirlik bul sonda? Ózime ózim ustaz bolmasam, kim ustaz bolmaq? Ózimdi ózim tárbıelemesem, osyǵan deıin alǵan bilim, tárbıemniń beker ketkeni me? Anamnyń basyna baryp, ómirdiń ras ótkinshi ekenine kóz jetkizip, ólimdi kóbirek oılasam ǵana, ár kúnim "durys" óter...

         Taǵy bir oılaýym kerek ol - Jarym, balapandarym. joldasym. Sol teńimniń ózime laıyq, men oǵan laıyq bolyp, ómirden laıksyz-aq laıyqty ornymyzdy alyp, ata-ana tilegin oryndap, bir-birimizge demeý bolyp, typ-tynysh, jerdiń bir buryshynda eshkimniń bizge, bizdiń eshkimge kesirimiz tımeı, eliniń erteńin oılar, aqyldy, sanaly urpaq tárbıelep... bala-shaǵalarymyzben ómir súrsek dep oılaǵanym jón-aý, sirá. Naǵyz jóndisi osy bolar. Soǵan Alla jetkizse... E, osy oıym naq keregi. Kóbirek, tereńirek, júrek túbinen, bar nıetimmen osy oıdy jetekke alaıyn... ...basqasy boldy, bolyp jatyr, bola beredi de, menimen de, mensiz de...

         Sonymen, Feısbýkqa bergen jaýabym osy boldy.

N.ǵ..: ....men tynystaǵannan aýa bitip, kúrsingennen aspan kúrkirep, jylaǵannan jańbyr jaýyp, kúlgennen kún shyǵa qoımas... kóptiń arasynda qarań-qurań etip, aman júre bereıik... biz de, Siz de, Kópshilik...

 Maqpal Sembaı