Dúnıe júziniń birneshe márte chempıony Jansaıa Ábdimálik jasy 20-ǵa tolmaǵan qyzdar arasynda álemdik reıtıńte klasıka, rapıd, blıs boıynsha jeke-dara kósh bastap tur. Qazaqstan shahmatynyń tarıhynda Jansaıaǵa deıin birden úsh tarmaq boıynsha álemdik reıtıńte top jarǵan shahmatshy bolǵan emes. Iaǵnı, Jansaıanyń bul tabysy - qazaq eli úshin tarıhı jeńis! Bul – Jansaıanyń álemdik jastar saıysyndaǵy tabysy.
Endi onyń eresekter básekesindegi qadamyna toqtalaıyq. 2019 jyldyń aqpan aıynyń reıtıńi boıynsha 19 jastaǵy Jansaıa Ábdimálik dúnıe júzindegi eń myqty áıel shahmatshylar arasynda 19-satyǵa taban tiredi. Jansaıa qazaqstandyq áıel shahmatshylardan birinshi bolyp 2017 jyly erlerdiń halyqaralyq grosmeıster dárejesine qol jetkizdi. Ol kezde bizdiń qyzymyz nebary 17-de bolatyn. Al áıelder arasyndaǵy halyqaralyq grosmeıster ataǵyn Jansaıa 14 jasynda oljalaǵan edi.
Qazaqtyń taǵy bir daryndy qyzy Dınara Sádýaqasova jer sharynyń eń kúshti áıel shahmatshylary reıtıńinde ázirge 22-orynda. Túsingen adamǵa Jansaıa men Dınara osy jeńisterimen qazaqtyń shahmattaǵy bedelin álemdik asqar belge kóterip tastady. Dál qazir jer júzindegi eń tańdaýly 25 áıel shahmatshynyń úsheýi ǵana musylman sportshylary. Solardyń ekeýi bizdiń qyzdar, al úshinshisi Iran shahmatshysy - Sarasadat Hademalsharıh. Onyń ústine shahmatta boks pen kúrestegideı salmaq dárejesine jiktelý joq. Boksta salmaq dárejelerine qaraı 10 adam álem chempıony atansa, shahmatta dúnıe júzi boıynsha erlerden bir, áıelderden bir sportshy chempıondyq tájdi kıedi. Bizdiń Jansaıa men Dınaranyń jumyr jerdegi 200-den asa memleket shahmatshylarynan sýyrylyp shyǵyp, moıny ozyq 22 sańlaqtyń qatarynan oryn tebýi Alash jurty úshin óte mereıli sát.
Taǵy bir qýana habarlaıtyn jaǵdaı, Jansaıa qyzymyz ázirge jer sharyndaǵy eń kúshti 30 áıel shahmatshynyń arasyndaǵy eń jasy kishisi.
Osydan birneshe jyl buryn Reseı mamandarynyń shaqyrýymen Máskeýge kóshken Bıbisara Asaýbaeva qyzymyz (jasy 14-te) álemniń TOP-100 áıel shahmatshylarynyń ishinde 89-orynǵa kóterildi. Alla jolyn ońǵarsa, endi eki-úsh jylda Bıbisara qyz Reseıdiń úsh jolaqty týyn shahmat kógine kótermesine kim kepil?!
Hosh, qyzdarymyzdyń shahmattaǵy qadamy jan súısintedi. Al Jansaıa men Dınaranyń deńgeıinde bir qazaq azamatynyń jarqyrap shyǵa almaǵany janymyzǵa batyp júr.
Endi eń ozyq áıel shahmatshylardyń álemdik reıtıńine nazar salyńyzdar:
|
Standard Top 100 Women February 2019 |
|
Qydyrbek Rysbek
Pikir qaldyrý