Dúnıede ananyń aq sútinen qymbat, ananyń alaqanynan aıaýly esh nárse joq. "Anańdy Mekkege úsh ret arqalap barsań da, aq sútin aqtaı almaısyń" deıdi dana halqymyz. Rasynda, pánı jalǵandaǵy jumaq ananyń alaqanynda bolsa, baqı jaıdaǵy "jánnat - ananyń tabanynyń astynda" deıtin támsil sóz bar. 
Buryndary anaǵa arnalǵan úshbý hattar "Altynnan ardaqty, kúmisten salmaqty, aıaýly ana" dep bastalatyny esimde. Óz basym áje baýyrynda óstim de, ana qadirin jete túsinbeppin. Soǵan qatty ókinemin... Anamyz 9 qursaq kóterip, Alla syılaǵan 3 qyz, 5 uldy tárbıelep ósirip, 52 jasynda ómirden ozdy. Balalarynyń qyzyǵyn kórý násip bolmaǵan eken.
Ótken bir aptadaǵy qaıǵyly oqıǵalar kezinde qatty tolǵanyp, aqyrynda osy oılarymdy FB jelisine jarıalaýdy jón kórdim. Keıbir sholaq oıly sheneýnikter "balany asyraı almasań, nege týasyń" degendi aıtyp qalyp jatyr. Bul - analardyń namysyna tıerlikteı asa ushqary pikir! Óıtkeni, jalpy adam balasynyń basty mısıasy ómirge urpaq ákelý emes pe? Jer betindegi barsha tirshilik te, adamzattyń bolashaǵy da - sol jaryq dúnıe esigin ashqan sábılerdiń sanymen jáne sapasymen tikeleı baılanysty bolatyndyǵy belgili. Azıa halyqtary, onyń ishinde Indıa, Qytaı, Indonezıa, Malaızıa, Pákıstan, Ózbekstan, t.b. elderdegi bala týý kórsetkishi, halyq sanynyń ósý qarqyny údeı túsýde. Mysaly, byltyr Qytaıda 17 mln-nan asa sábı ómirge kelipti. Bylaı qaraǵanda, búkil Qazaqstan halqynyń sanyna jete qabyl kórsetkish. Kórshi Reseıde analardy bala týýǵa yntalandyratyn qarjylaı kómektiń bizdegiden birneshe esege kóbeıgenin kórip otyrmyz.
Al bizdiń elde ana men bala problemasy kópten qordalanyp, sheshimin tappaǵan kúrmeýli máseleler barshylyq ekendigin sońǵy aptadaǵy oqıǵalar aıǵaqtap otyr. 
Ásirese, eldegi 300 myńnan asa kóp balaly analardyń áleýmettik jaǵdaıy kópshilikti alańdatyp otyrǵany jaıdan jaı emes. Bázbireýler «balanyń sanynan góri sapasyna nazar aýdaraıyq» degendi alǵa tartady. Buǵan kelisý qıyn. Sebebi, qazaq atamyzdyń: "Bir bala - joq bala, eki bala - jarty bala, úsh bala - naǵyz bala" degen dana sózin eskersek, halqymyzdyń sanyn kóbeıtýge septigin tıgizetin 3-shi, 4-shi baladan bastalady. Keńes úkimetiniń sońǵy jyldarynda qazaq áıelderiniń týýyna qoldan kedergi jasaǵandaı boldy. Sol teris saıasattyń yqpaly ınersıaly túrde bolsa da áli jalǵasyp keledi. Kóptegen jaǵdaıda dárigerler qazaq áıelderine túrli syltaý aıtyp, "keserovo" jasaýdy usynady. "Qanyń az, ózdigińmen bosana almaısyń, qan qysymyń turaqsyz, analıziń unamaı tur, ómirińe qaýipti" degendi aıtyp, olardy operasıamen týýǵa ıtermeleıdi. Bir-eki ret kesip alǵan ana úshinshi, tórtinshi balaǵa táýekel ete almaıtynyn ómirde kórip júrmiz. Al eldiń aıtýynsha, «operasıa degenimiz bopsalap, aqsha alýdyń bir joly» deıdi. Negizi, urpaqtyń bolashaǵy tek ádemi ómirimen ólshenbese kerek. Neshe bir daryndy, talantty, oıly da soıly azamattar sol baıaǵy aýyldaǵy jupyny, kópbalaly otbasylardan shyqqandyǵyn da bilemiz. Búgingi álem tanyǵan Elbasy bir kezdegi qarapaıym ǵana qoıshynyń shańyraǵynda óskeni ótirik pe?!
Endeshe, dál qazir bir qolyn eki ete almaı, birine jetse, birine jetkize almaı, sharasyzdyqtan shyryldap, el azamattarynyń esigin qattyraq qaǵyp júrgen analarymyzdyń jaǵdaıyna janashyrlyq tanytqan jón bolar. Bálkim, osy kúni bala úshin baıbalam salyp júrgen sol kóp balaly analardyń biriniń jeteginde, ne besiginde, ne qursaǵynda Qazaq eliniń 4-shi me, álde 5-shi me prezıdenti júrmesine kim kepil? Olardyń arasynan keleshekte tamasha aqyndar, daryndy sáýletshiler, mýzykanttar men myqty ǵalymdar shyǵaryna kúmánińiz bolmasyn!
Qudaıǵa shúkir, Qyzylorda oblysynyń bılik basyndaǵy azamattar kóp balaly analardyń janaıǵaıyna túsinistikpen qarap, múmkindiginshe analarymyzdyń aryz-tilekterin qabyldaýǵa jaǵdaı týǵyzyp jatqanyna kýámiz. Senbiden beri Oblystyq turǵyndardy jumyspen qamtý mekemesi, Asqar Toqmaǵambetov atyndaǵy teatr zalynda, barlyq aýdandardyń jaýapty oryndarynyń laýazymdy qyzmetkerleri qoǵamdyq ashyq qabyldaý ótkizip, kóp balaly analardyń talap-tilekterimen tanysýda. Analardyń ótinishteri men usynystaryn tirkeý aldaǵy kúnderde de jalǵasatynyn týraly aqparat áleýmettik jelilerde jarıalandy. 
Sóıtse de, jesirin jylatpaı, qyzdy qadirlep, analaryn ardaqtaǵan Alash elinde kópbalaly Ana ataný - maqtanyshqa aınalar kúnge de jetermiz degen úmitpen jazbamdy aıaqtaımyn.
Anany qurmetteý - óz anańdy qadirleý ekenin umytpaıyqshy, azamattar!

Serikbaı Qylyshbaıdyń fessbýktegi paraqshasynan