QR İshki ister mınıstri Erlan Turǵymbaev aldaǵy ýaqytta jýrnalıserden qashpaı, olarmen dostyq qarym-qatynasta bolatynyn aıtty, dep jazady Qamshy.kz aqparat agenttigi Tengrinews.kz saıtynyń deregine súıenip.

«Men sizderden eshqaıda qashpaımyn, dos bolamyn. Janymda keńesshim bar, jumys bastalyp ta ketti», - dedi jańadan saılanǵan mınıstr.

Sondaı-aq, ol qazirgi ýaqytta órt qaýipsizdigine basa nazar aýdaryp otyrǵandyǵyn aıtty.

«Birneshe sharalar josparlanǵan, qazirde ol aqyryndap júzege asyp kele jatyr. Eń basty másele – búginde elimizde vremánkalar kóp jáne olardyń basym kópshiligi pesh jaǵady, al ol peshteri órtke qarsy qaýipsizdik sharalaryna saı kelmeıdi. Olardyń barlyǵymen profılaktıkalyq jumystar júrgizý úshin búkil Qazaqstanǵa órt sóndirýshiler jetpeıdi», - dep aıtyp ótti mınıstr.

Óz sózinde vedomstvo basshysy barsha qazaqstandyqtarǵa qarapaıym órt qaýipsizdik erejelerin saqtaýǵa shaqyrdy.

«Adamdar, eń aldymen, ózderi jáne jaqyndarynyń qamyn oılaýy tıis. Qandaı jaǵdaı bolsa da, únemi memleket kináli dep esepteıdi. Iá, biz rasymen de órt qaýipsizdigin qadaǵalaıtyn jaýapty mekememiz. Alaıda, óz balalary, baspanasy men jaqyndarynyń qaýipsizdigine, eń birinshi, turǵyndar jaýapty», - dep aıtyp ótti Turǵymbaev.

Esterińizge sala keteıik, aǵymdaǵy jyldyń 12 aqpanynda Erlan Turǵymbaev QR İshki ister mınıstri qyzmetine kiriskeni belgili. Eks-mınıstr Qalmuhambet Qasymov bolsa ,Elbasynyń keńesshisi – Qaýipsizdik keńesiniń hatshysy qyzmetine taǵaıyndaldy.

Al 18 aqpanda Nurdildá Oraz QR İshki ister mınıstriniń keńesshisi qyzmetine kiristi.

Usynǵan: Nazerke Labıhan