Reseı mádenıetiniń shyńyn shyn talantymen moıyndatqan sanaýly qazaq bolsa, sonyń biri - Batyrhan edi. Aqyry jat jerde júrip, júrek talmasynan qaıtys boldy. Sol kúni búkil reseıdiń óner juldyzdary taıly-tuıaǵymen kúńirendi. Qazaq ulynyń qazasyna qaıǵyrdy, qabyrǵalary qaıysty. BAQ bizge sony kórsetti. Qazaqstannyń barlyq aımaqtaryndaǵy Batyrdyń ónerine tabynýshy, jankúıerleri belsendilik tanytyp, eske alý sharalaryn uıymdastyrdy. Sóıtti de, ásiredinshilderdiń syn sadaǵyna ilindi. Já, ony qoıshy. Men Batyrdyń ánderin súısinip tyńdaıtynmyn. Qurmetteýge de joq emes em. Alaıda sońǵy kezderi áleýmettik belsendiler Almatydan, dálirek aıtsam, Kóktóbeden Batyrhanǵa eskertkish ashý týraly bastama kóterip, qol jınaýǵa kirisip ketipti. Bul endi, artyq. Batyr shyn talant. Alaıda, qazaqta esimimen kóshe atalýy, eskertkish músini ornatylýy tıis qanshama alyptar bar. Soǵan toqtala ketelik. Táýelsizdiktiń 24-jylynda bórkimizdi aspanǵa atyp, jarysa qaýmalasyp, maqtana jazyp jer-kókke syımaı jatyrmyz. Alaıda, sanamyz ben rýhanıatymyz táýelsizdik nyshandaryna úılese alyp jatyr ma? Saıası-ekonomıkalyq máselelerdi aıtpaǵanda, rýhanıat pen ulttyq sana serpilisi kóńil jubatpaıdy. Elimizdiń kezinde talaı jyl astanasy bolǵan, qazirgi mádenıet pen ǵylymnyń oshaǵy Almaty qalasyndaǵy kóshe ataýlaryna kóz jiberseńiz, taptaýryn bolǵan seńniń áli kúnge sógile qoımaǵanyna kýá bolasyz. Almaty kósheleri otarshyldyq ataýlardan aryla almaı otyr. Seń bolyp turǵan Fýrmanovtyń kóshesin kim úshin saqtap otyrmyz. Shevshenko, Polejaeva, Dagestanskaıa, Gete, A.Eırıh t.b. tizbeleı berseń aýyz talady. Bastamashyldardyń Batyrhanǵa kóshe atyn berý, eskertkish músinin ornatý ıdeıasy jaqsy ǵoı. Biraq, qazaq rýhanıatyna, ádebıeti, mádenıetine, qoǵamyna eleýli eńbek sińirgen, esimderi ne bir kóshege, ne bir mekemege berilmegen aıaýly azamattar bar emes pe?! Qadyr aqyn Myrza Áli, Tumanbaı Moldaǵalıevter she? Almaty qalalyq ákimdigine, Ahmetjan Esimov myrzaǵa deıin hat jazylǵanymen, másele áli sheshimin tapqan joq. Qurǵaq ýáde. Batyrhanǵa eskertkishti Kóktóbedegi "The Beatls" tobynyń tas músiniiń janyna berýdi usynypty. Biraq, erte. Bir ónerpazǵa eskertkish onata salý oıynshyq emes qoı. Eskertkish ol - tarıh. Al tarıhta Batyrhannan da dańqty, laıyqty azamattar bar.
Nurgeldi Ábdiǵanıuly, Facebook paraqshasynan
