Qaraǵandydaǵy №6505 áskerı bóliminde oqqa ushqan sarbazdyń denesi tabyldy dep habarlady Qamshy.kz aqparat agenttigi KTK telearnasynyń deregin negizge alyp.

Bul joly da qaza tapqan jańa shaqyrtylǵan jap-jas jaýynger. Áskerıler ony da «ózin atyp óltirdi» dep otyr. Degenmen, qaraly habardan qabyrǵasy qars aıyrylǵan týystary sarbazdyń sýısıd jasaǵyna senbeıdi. Sebebi, marqum aldyńǵy kúni ǵana úıine habarlasyp, áskerı ómirdiń unap jatqanyn aıtqan.

Tań atpastan sýyt habar estigen ana qaıta-qaıta esinen tanyp jatyr. Al, jetpistegi ájesi bolsa senbeı, nemeresine qoımaı qońyraý soǵýda. Aıtýynsha, jaqynda ǵana áskerden hat alǵan eken. Onda sarbaz Ulttyq ulandy jer-kókke syıǵyzbaı sıpattap, komandırlerimen maqtanǵan. Odan qaldy, aldyńǵy kúni ǵana anasyna qońyraý shalyp, áskerı ómirdiń unap jatqanyn aıtqan. Degenmen, solaı degen sarbazdy basshylary «sýısıd jasady» dep sendiripti. 

«Qatardaǵy Álibı Sapa óz-ózine qol-jumsap, qarý arqyly mert bolǵany anyqtaldy. Kóńil-kúıi jaqsy bolǵan edi. Kenetten bolǵan jaǵdaı. Ondaı oıy joq bolatyn. Bárimiz tań qalyp otyrmyz», - deıdi 6505 áskerı bólim komandıriniń orynbasary Maqsut Júsipbekov.

Jalpy, 6505 áskerı bólimdegiler jaýyngerleriniń ólimine jylda tań qalyp júrse kerek. Óıtkeni, 2013-te de, 2014-te de munda birneshe sarbaz ólgen. Onda da óz-ózine qol jumsady delingen. Onyń bireýi asylǵan kúıi tabylsa, qalǵany oq jaraqatynan ólgen.  Al 18 jastaǵy Álibı Sapanyń qazasyna qatysty tergeý bastalyp ta ketti. 

Oqqa ushqan sarbazdyń denesi tańǵy 7:40-ta tabylypty. Aınalasy jıyrma mınýttyń ishinde saraptama jasap tastaǵandaı, áskerı bólimdegiler «bala óz-ózin atyp óltirdi» degen sheshim shyǵaryp qoıǵan deıdi týystary.

Usynǵan: Ásel Bolatqyzy