Almatyda belgisiz bireýler kóshede ketip bara jatqan boıjetkendi býyndyryp, tonap ketken, dep habarlaıdy Qamshy.kz aqparat agenttigi.

Bloger Dýman Jumadilov óziniń Facebook paraqshasynda eki jigittiń bir qyzǵa tap berip, býyndyrǵan vıdeosyn jarıalady. Vıdeoda kóringendeı, olar qyzdy býyndyryp, keıin shýbasyn sheship sómkesimen birge alyp ketken.

«Qyzdar abaılap júrińizder! Jigitter de. Jetisý mıkroaýdany 4, Kazkom bankiniń mańy», - dep jazady bloger.

Vıdeodaǵy kadrlardan oqıǵanyń túngi 1:30 shamasynda bolǵany kórinedi. Bir jigit qyzdy býyndyryp, ol esinen tanyp qalǵannan keıin jerge jatqyzyp shýbasyn sheship alǵan, al onyń sybaılasy bergi shette kútip turǵan.

Almaty Polısıa departamentinde bul jaıtqa baılanysty pikir bildirdi. Belgili bolǵandaı, zardap shekken áıel aman qalǵan.

«15 aqpanda túngi ýakqytta 35 jastaǵy áıelge qaraqshylyq shabýyl jasalǵan faktisi boıynsha Áýezov aýdandyq polısıa basqarmasynda QR QK-niń 192 baby  boıynsha qylmystyq is qozǵalyp, sotqa deıingi tergeý jumystary júrgizilýde.

Osy qylmysty sheshýge baǵyttalǵan birqatar is-sharalardy júzege asyrý úshin jedel-tergeý toby quryldy: qylmystyq is ashylady, kináli adamdar laıyqty jazalaryn alady.

Sonymen qatar, qaraqshylyq shabýyldan áıel adam zardap shekken joq, ol dárigerlerdiń kómegine júginbedi: onyń ómiri men densaýlyǵyna eshteńe qaýip tóndirmeıdi», - dedi Almaty polısıa departamentiniń baspasóz-hatshysy Saltanat Ázirbek.

Usynǵan: Nazerke Labıhan