Bul jaıynda atalǵan telearnanyń dırektory Qanat Erjigitov búgin jýrnalısermen kezdesý barysynda atalǵan telearnany ashý kópten kóńilde júrgenin, osydan 2,5 jyl buryn «Juldyz» arnasyn ashqanyn, endi sonyń janynan «Dombyra» telearnasy ashylyp otyrǵanyn aıtty, – dep habarlaıdy Qamshy.kz aqparat agenttigi.

Dırektordyń aıtýynsha, alǵash «Juldyz» telearnasyn ashqanda halyq tarapynan «sizder qazaqtyń dástúrli án-kúılerin berseńizder» degen ótinishter kelip túsken. Keıin zertteı kele rasymen de dástúrli mýzyka boıynsha telearna joq ekenine kóz jetkizipti.

«Qazir bul salada tyń dúnıeler óte az, sondyqtan, eki aı boldy Almaty men Astana qalalarynda túsirilimderdi bastap kettik. Telearna qazir ID tv kabeldik júıesinde testili rejımde tur. Juma nemese dúısenbi kúni tolyqtaı qosylady. Negizgi maqsatymyz - ár qazaq dástúrli ónerdi kez-kelgen ýaqytta teledıdardy qosyp kóre alatyndaı jaǵdaıǵa jetkizý. Telearnada tek dombyra jaıly emes, jalpy ulttyq mýzyka aspaptary jaıly habar taraıdy», – dedi Qanat Erjigitov.

Telearna 100 paıyz qazaq tilinde 24 saǵat boıy qazaq óneri jaıly habar taratady.

«Bul qýanyshty úlken shara. Qazir dańǵaza mýzykanyń jaýlap bara jatqany janyńdy aýyrtady. Estrada jeńil janr ekeni belgili, alaıda onyń barlyǵyn joqqa shyǵarǵymyz kelmeıdi. Ár qazaqtyń úıinde kúmbirlegen dombyranyń úni estilip jatsa ol balaǵa sińe berer edi. Qolǵa alynyp otyrǵan bul sharýanyń ózi «Rýhanı jańǵyrýǵa» tán dep oılaımyn», – deıdi Qazaqstanǵa eńbegi sińgen artıs Seken Turysbekov.

Usynǵan: Maqpal Sembaı