Nazarbaeva "Sóz bostandyǵy ındeksinde" Qazaqstan kórsetkishteriniń nasharlaǵany" jaıly suraǵan jýrnalıske: "Sóz bostandyǵy joq dep sanaısyz ba?" dep qaıtara saýal qoıyp: "Qalasańyz, bárine urysyp, synaı berińiz. Áleýmettik jelide bári ashyq jazylady. Qandaı reıtıńini aıtyp turǵanyńyzdy bilmeımin" dep jaýap berdi.

Nazarbaevanyń aıtýynsha, "reıtıńiniń bárine sene berýge bolmaıdy - bári reıtıńini kim, ne úshin qurastyratynyna baılanysty".

"Shekarasyz tilshiler" (Reporters Without Borders) halyqaralyq uıymynyń byltyr sáýirdegi esebinshe, Qazaqstandaǵy sóz bostandyǵy men baspasóz erkindiginiń jaǵdaıy nasharlaı túsken. Astana "baspasóz erkindigi reıtıńinde" 54,41 upaımen 158-orynda tur.

"Eldegi repressıa spırali tómendegen joq. Qazaqstandy otyz jylǵa jýyq úzdiksiz basqaryp otyrǵan Nursultan Nazarbaevtyń izbasary týraly aıtylmaıdy. Al Nazarbaev bılikti óz qolyna alyp, ony saqtap qalý úshin qysymdy kúsheıtti" dep jazady uıym.

Zertteý avtorlarynyń aıtýynsha, Qazaqstandaǵy negizgi opozısıalyq gazetter 2012 jyly jabyldy. Qalǵandary kóptegen aıyppuldardan keıin jumysyn toqtatýǵa májbúr bolǵan. "Shekarasyz tilshiler" uıymy Qazaqstanda 2017 jyly BAQ týraly zańǵa ózgertýler engizilgenin, bul zań jýrnalıserdiń jumysyn qıyndata túskenin jazady.

"Jýrnalıser kóp qýdalaýǵa ushyraıdy. Qazir el bıligi ınternetti baqylaýǵa alǵan. Elde saıttar, áleýmettik jeliler men messendjerler kóp buǵattalady" dep jazylǵan zertteýdiń Qazaqstan týraly bóliginde.

Usynǵan: Nazerke Labıhan