Qazaqstan Respýblıkasy Indýstrıa jáne ınfraqurylymdyq damý mınıstri bolyp Roman Sklár taǵaıyndaldy, dep habarlaıdy Qamshy.kz aqparat agenttigi QR Parlamenti Májilisiniń baspasóz qyzmetiniń deregin negizge alyp. 

Depýtattar  Roman Sklárdiń kandıdatýrasyn biraýyzdan maquldady.

Buǵan deıin bul qyzmetti Jeńis Qasymbek atqarǵan bolatyn. 

Sklár Roman 1971 jylǵy 8 mamyrda Pavlodar qalasynda týǵan.

«Injener-qurylysshy» mamandyǵy boıynsha Pavlodar memlekettik ýnıversıtetin, sondaı-aq «Ekonomıs» mamandyǵy boıynsha Máskeý qazirgi zaman bıznes ınstıtýty men «Zańger» mamandyǵy boıynsha Qazaq quqyqtaný jáne halyqaralyq qatynastar ınstıtýtyn bitirgen.

Eńbek jolyn 1989 jyly «Ekıbastýzýgleavtomatıka» montajdaý-jóndeý basqarmasynda Slesar-montajshy bolyp bastap, keıin «Vahınvest» BK-da tehnıkalyq qaýipsizdik jónindegi ınjener jáne komersıalyq salada qyzmet etken.

2002-2003 jyldary Pavlodar oblystyq dármensiz boryshkerlermen jumys jónindegi komıteti basqarmasynyń bólim bastyǵy, 2003-2005 jj. Pavlodar qalasynda memlekettik satyp alý basqarmasynyń bastyǵy, Pavlodar oblysy ákiminiń bas ınspektory bolyp eńbek etti. 2005-2006 jj. Pavlodar qalasy ákiminiń orynbasary, apparat jetekshisi, 2006-2007 jj. Astana qalasy ákimi apparatynyń ınfraqurylymdy damytý bóliminiń meńgerýshisi qyzmetin atqarǵan.

Odan keıin Astana qalasynyń energetıka jáne komýnaldyq sharýashylyq (basqarma basshysy) departamentiniń dırektory (10.2007-10.2008) boldy. 2008 jylǵy qazan aıynan 2010 jylǵy qarasha aıyna deıingi merzimde Pavlodar oblysy ákiminiń orynbasary, Pavlodar oblysy ákiminiń birinshi orynbasary laýazymynda qyzmet etken.

2011 jylǵy 17 mamyrdan 2013 jylǵy qazan aıyna deıin QR Kólik jáne komýnıkasıa vıse-mınıstri, 2014-2016 jj. «Qazaqstan Temir Joly» AQ vıse-prezıdenti bolǵan. 2016 jylǵy naýryzda «Nur Otan» partıasynan QR Parlamenti Májilisiniń VI shaqyrylym depýtaty bolyp saılandy, Ekonomıkalyq reforma jáne aımaqty damytý komıtetiniń tóraǵasy qyzmetin atqarǵan. 2016 jylǵy mamyr aıynda QR Ulttyq ekonomıka vıse-mınıstri (05.2016-23.12.2016) boldy.

2016 jylǵy 23 jeltoqsanda QR Investısıalar jáne damý vıse-mınıstri qyzmetine taǵaıyndalǵan bolatyn.

«Qurmet», «Parasat» ordenderi (2017 j.) «Astananyń 10 jyldyǵy», «QR Táýelsizdiginiń 20 jyldyǵy», «Qazaqstan halqy assambleıasynyń qoǵamdyq «Birlik» altyn medali» mereıtoılyq medaldarymen marapattalǵan.