Oqýshylar arasyndaǵy eń belsendi oqyrman ákimniń qolyna erekshe syılyq aldy, dep jazady Qamshy.kz aqparat agenttigi  Sputnik Qazaqstan saıtynyń deregine súıenip.

Pavlodar oblysyndaǵy aýdan ortalyǵy – Tereńkól aýylynda №2 mekteptiń 5-synyp oqýshysy Oleg Aıtpaev basty syılyq retinde eshki utyp aldy. Ol byltyr 125 kitap oqyp shyqqan, dep habarlady aýyldyń jańa ákimi Ajdar Júsipov.

Onyń málimetine súıensek, bul saıysty ákimdik Tereńkól aýylynyń kitaphanasynda ótkizgen. Zeınetkerler men jastar arasyndaǵy belsendi oqyrmandarǵa bir qorjyn azyq-túlik tartý etipti. Zeınetkerler arasynda úzdik oqyrmandar – Svetlana Mıhaılovna Babaıseva (215 kitap) men Botabaı Qabylbekuly Saǵıtov (120 kitap), jastar arasynda – 11-synyp oqýshysy Alına Makoves (76 kitap). Memlekettik tilde eń kóp kitap (jeteý) oqyǵan 6-synyp oqýshysy Aqnur Zeıneǵalıeva boldy.

Oqyrmandardy marapattaý saltanaty aýyl kitaphanasynda 23 aqpanda ótken.

Esterińizge sala ketsek, buǵan deıin Pavlodarskoe aýylyn basqarǵan Ajdar Júsipov qyzyqty naýqandar ótkizip, turǵyndarǵa degen erekshe qamqorlyǵymen kópshilikke tanylǵan edi.

Máselen, ol "Úzdik aýla" baıqaýyn ótkizip, jeńimpazǵa átesh syıǵa tartqan bolatyn. Aýyldaǵy basqa saıystarda jeńiske jetkender laq, qozy, tipti toraı utqan edi. Maslenısa merekesin toılaǵan kezde ákim jergilikti aspaz áıelge úlken tort ázirletip, aýyldyń búkil turǵyny men qonaqtaryna tegin aýyz tıgizgen. Al byltyr 9 mamyrda Uly Otan soǵysynyń ardagerlerin úlken lımýzınge otyrǵyzyp qydyrtty.

Ajdar Saǵyntaıuly agenttikke habarlaǵandaı, Tereńkól ákimdigi 8 naýryz merekesine daıyndyqty bastap ketti. Jergilikti kásipkerlermen birge aýyldyń kópbalaly analaryna tosynsyı ázirlep jatyr eken.

Usynǵan: Nazerke Labıhan