Dınara (esimi ózgertilgen) esimdi jýrnalıs osydan 10 jyl buryn prezıdent rezıdensıasyna úı tazalaýshy bolyp barǵan eken. Sondaǵy kórgenderi men basynan keshkenderi jaıly Esquire tilshisine aıtyp berdi.

Bul oqıǵa osydan 10 jyl buryn bolǵan. Ol kezde ajyrasqan jas ana edim. Ýnıversıtet bitirip, jarnama gazetinde jumys istep júrdim. Myqty jýrnalıs bolýdy armandap júrgen balaýyz kezim. Ózim turyp jatqan lashyqtan bosap, megapolıske kóshýdi maqsat tutqan kezim. Áıteýir ulymnyń balabaqshasy men tamaqqa aqsha tabylsa, tóbem kókke jetip qýanyp júrgen kezim. Osylaısha jumysqa ornalastyrý agenttigin basqarǵan Qarlyǵashpen tanyspyn.

Kóktemniń salqyn keshi edi. Bizdiń redaksıada jumys qyzyp jatyr. Sebebi qalaǵa resmı saparmen prezıdent keledi degen habar tarady. Suhbat almasaq ta, barlyq qalalyq BAQ ákimdikke jumys isteýi tıis edi. Máselen, qaladaǵy negatıvti jańalyqtardy jazýǵa tyıym salyndy.

Dál sol sátterdiń birinde maǵan Qarlyǵash habarlasty. Ol demalystyń bir kúninde baqandaı 3 myń teńge tabys tabýdy usyndy: prezıdent rezıdensıasyn tazalaý. Sóıtip ómirimde alǵash ret ózge ǵımaratty tazalaýǵa attanyp kettim. Oıyma neshe túrli qýlyqtar kele bastady. Rezıdensıa ishin sýretke túsirip, belgili basylymǵa satyp jibersem be eken?..

Ǵımaratqa kirý máselesi sheshildi, al fotoaparat máselesi qıyndaý boldy. Meni qýyp jiberse qaıtemin, al fotoaparatymdy tartyp alsa she, áli tólenbegen nesıesi bar.

Já, uıaly telefonymmen-aq kire beremin, sapasyz túsirse de, kamerasy bar. Eń bastysy fotonyń eksklúzıv bolǵany. Jolym bolatynyna senimdi boldym. Sebebi «úı tazalaýshylar, baqtashylar men taksıshilerdi eshkim baıqamaıdy, olar kózge kórinbeıdi de» degen fraza esime tústi.

Belgilengen kúni qalalyq ákimdikke bardym. Sonda jınalǵan 20 shaqty áıeldiń ishinde qaıda baratynymyzdy men ǵana biletin sekildimin. Boıymdy bir diril bıledi, qorqynyshtan emes, qobaljyǵandyqtan bolý kerek. Birde túrli tylsymdardy oılaı bastadym.

Mine, jolǵa shyqtyq. Aınalamyzda ne úı, ne ǵımarat joq. Qaladan on shaqty shaqyrymǵa qashyq ornalasqan úlken qaqpaǵa kirdik. Jylyna mıllıondaǵan salyq tólenetin mekenge keldik.

Aıtpaqshy, vıdeo baqylaý bolǵan joq. Metal izdegish te bolmady, erkin kirdik. Sonda fotoaparatymdy almaı shyqqanym úshin qatty ókindim.

Alǵashqy prezıdentimizdiń rezıdensıasy qandaı? İshi dóńgelek. Kúmbezdi shatyr. Aýlasynda dóńgelek haýyz, al janynda arka, ne úshin turǵany belgisiz. Arka esikter men dóńgelengen baspaldaqtar.

Jalǵyz jatyn bólme bar, dál ortasynda ornalasqan dóńgelek tósek. Qatty úlken emes, qarapaıym eken. Qatty kúreń barqyt perde. Qyzyqtyń bári jýynatyn bólmede. Tóbesi ádemi mozaıkalarmen qaptalǵan. Altyn túske boıalǵan rakovına men dárethana. Bári altyn!

Mundaı ǵajapty ómirimde kórgen emespin. Bul sátti tıimdi paıdalanýǵa tyrystym. Bólmeniń esigin japtym da, birneshe kadr jasadym. Eń bastysy, úlken aınada ózim kórinip qalmasam bolǵany. Biraq bir mınýt bolmaı, bólmege júzi sýyq qaýipsizdik qyzmetiniń qyzmetkeri kirip keldi. Ol esikti ishinen jappaýymdy surady. Eger qysylyp tursam, astynda qyzmetkerlerge arnalǵan arnaıy bólmeniń bar ekenin mádenıetti túrde túsindirdi.

Túski ýaqytty da sátti paıdalandym. Menimen birge kelgen tátelerim tústenip jatqanda, jatyn bólmeni de túsirip aldym. Vanany da, maǵynasyz arkany da, haýyzdy da túsirdim. Tátelerim meni "erigip júr" dep oılap, baspaldaqty jýýǵa májbúrledi. Sol kúni aýyryp qalǵanymdy aıtyp, dosyma habarlasyp, álgi jerden ketip qaldym. Shyǵar kezde de meni eshkim teksergen joq.

Al bul oqıǵa qalaı aıaqtaldy deısizder ǵoı? Qarlyǵashtyń nómirinen bir er adam habarlasyp, telefondaǵy sýretterdiń bárin óshirýimdi talap etti. Eshkim teksermedi, qorqytpady, tipti ańdymady da. Al sýretterdi baspaǵa ótkizip qoısam, ne bolar edi? Shúkir, oǵan jetpedi. Tipti bul jaǵdaılardy anam da bilmedi. Jaı ǵana sýretterdi óshire saldym.

Aýdarǵan: Gúlim Jaqan