Oqý ortalyqtary jumyssyzdardy jumysshy mamandyqtarǵa oqytady.

Mamandardy daıyndaý salasynda atqarylǵan jumys nátıjesi Almaty oblysy Kásipkerler palatasynyń dırektory Narıman Ábilshaıyqovtyń Óńirlik komýnıkasıalar qyzmeti alańynda ótken baspasóz-konferensıasy barysynda aıtyldy.

Spıkerdiń aıtýynsha, «Eńbek» Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy aıasynda Óńirlik kásipkerler palatasy 26 oqý ortalyǵyn ashýǵa atsalysty, onyń ishinde 20 oqý ortalyǵy kásiporyndar janynan qurylǵan.

«Byltyr kásiporyndar janynan 20 oqý ortalyǵyn ashýǵa kómek kórsettik, onda 852 adam oqyp shyqty. Olardyń barlyǵy jańa jumys mamandyqtaryn aldy. Oqyp shyqqandardyń 72%-y jumysqa turdy», – dedi Narıman Ábilshaıyqov.

«Eńbek» memlekettik baǵdarlamasy sheńberinde kásiporyndar memlekettik búdjet esebinen ózderine mamandardy daıyndaı alady. Ol úshin kásiporyn Óńirlik kásipkerler palatasyna «Atameken» UKP oqý ortalyqtary tizilimine engizý úshin ótinim jiberip, oqý ortalyǵyn qurýy kerek. 2017-2018 jyldary óńirdegi 9 oqý ortalyǵy Jumyspen qamtý ortalyqtarynan jumyssyzdardy oqytý boıynsha memlekettik tapsyrysty aldy.

Budan bólek, Narıman Ábilshaıyqov Dýaldi bilim berý jol kartasyn júzege asyrylýy týraly málimet berdi. Onyń aıtýynsha, bıznes, kolej jáne stýdentterdiń úshjaqty múddeliligi esebinen sońǵy jyldary  mamandardy daıyndaýda Jol kartasy qatysýshylarynyń – kolej bitirýshileriniń jumyspen qamtylý paıyzy únemi ósýde. Dýaldi oqytý aıasynda 2017 jyly túlekter arasynda jumyspen qamtylý 71%-dy qurady, byltyr kórsetkish – 79%-ǵa jetti. Bilim berý basqarmasynyń derekteri boıynsha túlekterdiń Dýaldi bilim berý kartasynan tys jumysqa ornalasý kórsetkishi –71,2%.

Oblystan Dýaldi bilim berý jol kartasyna barlyǵy  tehnıkalyq jáne kásiptik bilim berý mekemeleriniń 2310 stýdenti qatysty. Oblystyń 24 koleji men 231 kásiporny arasynda  20 mamandyq pen 10 sala boıynsha  mamandardy birlesip oqytý týraly kelisimder jasaldy.