Almaty oblysynyń Aqsý aýdanynda  iri joba júzege asyrylýda. «Panel SSistem.kz» kompanıasy Altynaryq aýylynda 5 myń iri qara malǵa arnalǵan bordaqylaý alańy men et óńdeý kesheniniń qurylysyn bastady.

«Kásiporyn shujyq, súıek uny, buqtyrylǵan et, ystalǵan et ónimderin óndirýdi josparlap otyr. Nátıjesinde, 2022 jyldan bastap eksport kólemin 2,5 esege arttyrýǵa tolyq múmkindik bar. Sonymen qatar, bul kompanıa Sýyqsaı aýylynda almabaq ósirý, kókónis qoımasyn salýdy josparlap otyr. Osy maqsatta atalǵan aýyldarda jalpy 218 gektar jer berildi. Jalpy joba quny - 1 mlrd 800 mln teńge», - deıdi Aqsý aýdanynyń ákimi Esim Bazarhanov.

Aýdan ákiminiń aıtýynsha, Kóshkental, Kóltaban, Saǵakúres aýyldarynda jańa mektep salý josparlanyp otyr. Qazir úsh bilim berý mekemesiniń jobalyq-smetalyq qujatyna 30 mln teńge qarajat bólingen. Sondaı-aq, Qapal, Aqsý, Aqyn Sara aýyldaryndaǵy mádenıet úılerine aǵymdaǵy  jóndeý  júrgiziledi. Bul maqsatqa oblystyq búdjetten 73 mln teńge bólingen.