Til janashyry Oǵyz Doǵan óziniń feısbýk paraqshasynda jańadan qurylǵan qazaq úkimetine qatysty bazynasyn bildirdi.

«Sizder, jarqyn keleshegi búginnen kórinip, jarqyrap turǵan, túrik dúnıesiniń kóshbasshysy - Qazaqstanymyzdyń basqarylýynda eń bıik orynda qyzmet eteıin dep jatqan, óte baqytty da óte bedeldi tulǵalarsyzdar!.. Sizderdi jańa laýazymdaryńyzben quttyqtaı otyryp, júzege asyraıyn dep jatqan isterińizde sáttilik tileımin...

Uly qazaq halqy, ǵasyrlar boıy bastan keshirgen sansyz qaıǵy-qasiretke, jaýdyń aıaýsyz shabýyldaryna, asharshylyqta aırylǵan mıllıondaǵan ul-qyzyna, repressıada joǵaltqan myńdaǵan otansúıer zıalysyna qaramastan, namysyn bermegen, túrkiniń kıeli uly dalasyn tastap ketpegen, tilin, dinin, mádenıetin aıaqqa taptatpaǵan halyq ekenin menen jaqsy bilesizder... Mundaı teńdesi joq ultqa "úkimet" bolý qandaı baqyt!..

Qazaq halqynyń sondaı azapty kezeńderden, túrik tiliniń sultany, qaımaǵy, gaýhary - ana tilin saqtap qalýynyń arqasynda aman qalǵanyn fılolog maman retinde sendirip aıta alýǵa tolyq quqyǵym bar dep oılaımyn!..

Sol úshin, eń aldymen sizderden burynǵy mınıstrlerdiń basqarý organdarynda qazaq tilinde onsha sóıleı bermeýiniń, kórshiniń tilin qazaq tilinen ústem kórýiniń qatelik ekenin, osynyń uly qazaq halqyna laıyq emes ekenin moıyndańyzdar... Qatelikten sabaq alý – ol aqyldylyq. Ómirde qatelespeıtin adam bolmaıdy. Eń mańyzdysy, óz qateligińdi der kezinde túsiný emes pe?!

Boıynda qazaqtyń qany bar týysqandaryńyz, túriktiń jeti atasyn biletin balasy retinde sizderden ótinemin, burynǵy qatelikti qaıtalamaı - QAZAQSHA SÓILEŃİZDER!..

Ómirin qazaq tiline arnaǵan, qazaq tili jóninde 2 kitap, ondaǵan ǵylymı maqala jazǵan fılolog doktor retinde sizderden suraımyn, burynǵy qatelikti qaıtalamaı - QAZAQSHA SÓILEŃİZDER!..»