Ánshi Ernar Aıdar Shymkent qalasynda “Aq baqytym” atty 3 D formatynda konsert ótkizgen soń, ony Qaırat Nurtaspen salystyrýshylar kóbeıdi. Tyńdarmandaryna 3 D formatta kesh uıymdastyrǵan ol jańa ánderin oryndap, kópshilikti qýantty. Ernar Aıdar – 2012 jyly “Jaryǵym-aı” ánimen halyqty eleń etkizip, tez tanylǵan ánshi. Búginde onyń árbir týyndysy hıtke aınalyp, tyńdarmandarynyń qataryn arttyrýda. Shymkentte ótken “Aq baqytym” konserti de bul jolda septigin tıgizbek. Sebebi, kesh 3 D formatta ótti. Konsert 4 bólimnen quraldy. Kesh barysynda qorjynyndaǵy 80-nen astam týyndynyń úzdikteri oryndaldy. Ernar Aıdardy  Qaırat Nurtaspen salystyryp, tanymal ánshige elikteıdi dep esepteıtinder kóp. Tipti, jas ánshi Qaırattyń izine erip, 3 D konsertin de elge usyndy. Biraq ánshi Qaıratqa eliktemeıtinin aıtyp, aqtaldy. Aldaǵy ýaqytta ol  jeke konsertimen elimizdiń ózge óńirlerin aralamaq. Keıinnen, melodrama janrynda kıno túsirip, basty róldi ózi somdamaq.