QR Ulttyq bank mamandary kolektorlyq agenttik ótinish jasaǵan jaǵdaıda qaryz alýshy neni bilýi qajettigin aıtyp berdi, dep habarlaıdy Qamshy.kz aqparat agenttigi.
QR UB baspasóz qyzmetiniń málimetinshe, 2017 jyldan bastap kolektorlyq agenttikterdiń qyzmeti «Kolektorlyq qyzmet týraly» zańmen retteledi. Zańǵa sáıkes QR Ulttyq banki kolektorlyq agenttikterdiń qyzmetin memlekettik retteý men baqylaýdy júzege asyrady.
Zańnyń erejelerine sáıkes kolektorlyq agenttik - ekinshi deńgeıdegi bankterdiń (bankter) nemese mıkroqarjy uıymdarynyń (MQU) qaryzdary boıynsha bereshekti óndiretin uıym.
Kolektorlyq agenttiktiń óz qyzmetin Ulttyq bankte eseptik tirkeýden ótkennen keıin jáne ony Kolektorlyq agenttikterdiń tizilimine engizgennen keıin ǵana júzege asyrýǵa quqyly ekendigin bilý qajet. Tizimdi Ulttyq banktiń saıtynan kórýge bolady.
Óndirip alý bereshekti óndirip alý shartynyń negizinde júzege asyrylady jáne banktik qaryz shartynda nemese mıkrokredıt berý týraly shartta banktiń jáne MQU-nyń úshinshi tulǵalardy tartýǵa quqyǵy bolǵan kezde ǵana yqtımal. Bul rette MQU-ǵa jeke tulǵamen jasalǵan jáne turǵyn úı túrinde kepilmen qamtamasyz etilgen shart boıynsha bereshekti óndirip alý úshin kolektorlyq agenttikti tartýǵa tyıym salynady.
«Bankter men MQU qaryz alýshynyń kelisimi bolǵan kezde qaryz, mıkrokredıt boıynsha talap etý quqyǵyn berýge nemese ózgeshe aıtqanda qaryzdy, mıkrokredıtti kolektorlyq agenttikke «satýǵa» quqyly. Mundaı jaǵdaılarda kolektorlyq agenttik jańa kredıtor bolady jáne berilgen sharttyń talaptaryn, sondaı-aq bankter men MQU-ǵa qoıylatyn barlyq zańnamalyq talaptar men shekteýlerdi saqtaýǵa mindetti.
Bankter talap etý quqyǵyn banktik qaryz sharty boıynsha 90 kúnnen astam, al jeke tulǵanyń ıpotekalyq qaryzy boıynsha 180 kúnnen astam tólemniń merzimin ótkizý bolǵan kezde berýge quqyly», delingen habarlamada.
Bul rette MQU talap etý quqyǵyn qaryz 90 kúnnen astam tólebegen kezde ǵana berýge quqyly. Kepilge turǵyn úı qoıylǵan jeke tulǵanyń mıkrokredıti boıynsha talap etý quqyǵyn kolektorǵa berilmeıdi.
Kolektorlyq qyzmetti júzege asyrý kezeńinde bankter men MQU boryshkerge qatysty bereshek kolektorlyq agenttikte jumysta bolǵan kezeńde syıaqyny, komısıalardy jáne ózge tólemderdi tóleýdi talap etýge, sondaı-aq, atalǵan kezeńde turaqsyzdyq aıybyn esepteýge quqyǵy joq.
Kolektorlyq agenttiktiń qyzmetkeri boryshkermen alǵash baılanys jasaǵan kezde tanysýǵa, kredıtordyń ataýyn jáne kolektorlyq agenttiktiń baılanys derekterin, Kolektorlyq agenttikterdiń tizilimindegi eseptik tirkeý nómirin, bereshek týraly aqparatty habarlaýǵa mindetti.
Kolektorlyq qyzmetti júzege asyrý tártibi týraly tolyq aqparat Kolektorlyq qyzmet týraly zańnyń 5-babynda belgilengen. Sondaı-aq, zańda kolektordyń boryshkerge habarlasatyn ýaqyty belgilengen.
«Kolektorlyq agenttiktiń boryshkermen ózara is-áreket etýi kolektorlyq agenttiktiń bastamasy boıynsha jeke baılanys jasaǵan kezde jumys kúnderi saǵat 8.00-den 21.00-ge deıingi kezeńde 1 retten kóp emes jáne telefonmen kelissózder júrgizý arqyly jumys kúnderi saǵat 8.00-den 21.00-ge deıingi kezeńde 3 retten kóp emes, jumys kúnderi saǵat 8.00-den 21.00-ge deıingi kezeńde sheshiledi», delingen habarlamada.
Kolektorlyq agenttik boryshkerge qaýip tóndirý, til tıgizý, bopsalaý, aldap-arbaý, sondaı-aq komersıalyq nemese QR zańymen qorǵalatyn ózge de qupıany jarıalaý sıaqty adal emes is-áreketterdi qoldanýǵa qatań tyıym salynady.
Aıta keterligi, 2018 jyly kolektorlyq agenttikterge qatysty ákimshilik aıyppul túrinde 5 sanksıa jáne 14 shekteý sharasy qoldanylǵan. Eger kolektorlyq agenttikter boryshkerdiń quqyǵyn buzsa, onda ol Ulttyq bankke nemese onyń aýmaqtyq fılıaldaryna ótinish bildire alady. Qoǵamdyq qabyldaý bólmeleriniń baılanys aqparaty Ulttyq banktiń saıtynda ornalastyrylǵan.
Usynǵan: Maqpal Sembaı
