Qazaqstandyq ýnıversıtet alǵash ret ASIIN halyqaralyq akredıtasıasynan ótti, dep habarlaıdy Qamshy.kz aqparat agenttigi QR Bilim jáne ǵylym mınıstrliginiń baspasóz qyzmetine silteme jasap.

Baspasóz málimetteri boıynsha, álemdik tájirıbege sáıkes búgingi kúni ýnıversıtetti akredıtteý, onyń jumysynyń alǵysharty bolyp sanalady jáne halyqaralyq akredıtteýdiń alǵashqy nátıjeleri onyń otandyq joǵary bilim berý júıesine qajettiligi men mańyzy týraly aıtýǵa múmkindik beredi.

2016 jyly Halyqaralyq IT Ýnıversıteti sapaly bilim berýdi usyný maqsatynda ASIIN (Germanıa) akredıtteý agenttigine ótinish berip, Qazaqstan ýnıversıtetteriniń tarıhynda tuńǵysh ret 5 jyldyq halyqaralyq ınstıtýsıonaldyq akredıtasıany aldy.

Atalǵan ýnıversıtet ujymy ASIIN saraptamalyq komıteti úshin esepti 2 jyl boıy daıyndady.

Akredıtteý komısıasynyń sheshimi boıynsha, HATÝ ınstıtýsıonaldyq halyqaralyq akredıtasıadan ótken Qazaqstandaǵy jalǵyz ýnıversıtet boldy.

ASIIN tekserý prosedýrasynyń nátıjeleri HATÝ-dyń sapany anyqtaý, resýrstardy basqarý jáne qujattamanyń ashyqtyǵy sıaqty salalary jetilgen deńgeıde ekendigin kórsetti. Ýnıversıtettiń rektory Damır Shynybekovtiń aıtýynsha, ASIIN ýnıversıtetterdiń qyzmet sapasyn baǵalaıdy jáne eýropalyq standarttar men krıterıılerge sáıkestiktigin moıyndaıdy.

Jalpy, búgingi tańda elimizdegi joǵary oqý oryndarynda ártúrli, ashyq bilim berý baǵdarlamalary jasalyp, álemdik eńbek naryǵynda túlekterdiń básekege qabilettiligi artyp keledi.

Aıta keteıik, ASIIN - bul ýnıversıtettiń halyqaralyq standarttarǵa sáıkestigin rastaý rásimi.  

Usynǵan: Maqpal Sembaı