Jeke tabys pen mal-múlkińiz jaıynda ashyq jarıalap, deklarasıa tapsyrýǵa bir jyl qaldy. Ýaqytynda esep bermegender jaýapkershilikke tartylady degen jańalyqtyń talqylanyp jatqanyna biraz boldy.Qujat toltyrý kezinde, tipti, toıdan túsken ne toıǵa jumsaǵan qarajatty kórsetý kerek degen de alyp qashpa áńgime bar. Bul týraly Qamshy.kz aqparat agenttigi habarlaıdy Eýrazıa birinshi arnasynyń deregin negizge ala otyryp.

Bizdiń atqarýshy organ ókilderi AQSH, Ulybrıtanıa, Sıngapýr, tipti Chılıdiń atalmysh júıesin zertteı kele,    «Tabysyń men mal-múlkiń jaıly aqparatty jarıala! Ashyq aıt ta, abyroıly bol!»  degen deklarasıalaýdy qolǵa alýdy usyndy.

“Deklarasıalaýdy kezeń-kezeńimen ótkizýdi qarastyryp jatyrmyz”, – dedi Álıhan Smaıylov.

El turǵyndary árbir ózgeristen bir jaqsylyq kútedi. Bul joly deklarasıalaýdyń arqasynda keı sheneýnikter qalaı baıyǵany áshkere bolar deıdi.

Bilmestikte uıat joq. Qarjy mınıstrligi ókilderiniń bólisken aqparattaryna súıensek, deklarasıalaýǵa negizinen kelesi dúnıeler jatady:

— Jyljymaıtyn múlikter: Páter, úı, jer ýchaskesi, ǵımarat, úı qurylysyndaǵy úlesińiz bolsa kórsetesiz. Munyń sheteldegi múlikke de qatysy bar.

— Kólik, motosıkl, qaıyq, tikushaq, ushaq jáne basqa da jyljymaly múlkińiz bolsa, ony da deklarasıalaý kerek.

— Depozıtte, bank shotynda, kartada jáne qolda bar qarajattaryńyz jaıynda da jasyryp qalýǵa bolmaıdy. Úıde tek 5880 AEK kóleminde, ıaǵnı 2019 jylǵy eseppen 14 mln 847 myń teńge kóleminde aqsha ustaýǵa bolady. Odan artyq somany deklarasıalap, depozıtke salýǵa mindettisiz.

— Qundy qaǵazdaryńyz bolsa tirkeýdi umytpańyz.

— Bireýden qaryz alyp nemese bergen kezde de kórsetý kerek.

Májilis depýtattary deklarasıalaýdy engizbes buryn jaýapty organdar daıyn ba, osyny pysyqtap alý alý kerektigin aıtady.

QR parlament májilisiniń depýtaty Bahtıar Máken: Adamnyń bylaı aıtqandaǵy janyndaǵy múligi bolsyn, jınaǵan dúnıesin kórsetý ǵoı. Óz ózin tazalandyrý. Tyǵyp almaı, bir jerge aparyp qospaı, sheteldegi birneshe bankke aqshasyn baryp quımaı.

Parlamentke zań jobasyn qorǵaýǵa kelgen mınıstrler de bul bastamany qoldap otyr.

Jalpyǵa birdeı deklarasıalaýdy kezeń-kezeńimen júzege asyrý josparda bar eken. Iaǵnı, 2020 jyl bastala salysymen qazaqstandyqtardyń barlyǵy birdeı esep berýge kirisip ketý mindet emes kórinedi.

«Birinshiden saıası memlekettik qyzmetkerler jáne olardyń jubaılary. «Korpýs A»-da turǵan memlekettik qyzmetkerler. QR sýdıalary, parlament depýtattary jáne kvazı memlekettik mekemelerdiń basshylary. Olar endigi jyldan bastap mindetti túrde ózderiniń deklarasıalaryn jarıa etýge mindetti bolady», – dedi QR qarjy mınıstrligi memlekettik kiris komıteti tóraǵasynyń mindetin atqarýshy Talǵat Mamaev.

Aılyǵy shaılyǵynan astpaıtyn azamattar úshin deklarasıanyń kelip-keteri joq. Advokat Jandos Tuıaqov osyǵan deıin amalyn taýyp, baryn jasyryp kelgender bul kezde de qarap qalmaıdy dep otyr.

«Kóp jaǵdaıda bul zań myna kóleńke bıznespen mysalǵa, korrýpsıa salasyndaǵy azamattarǵa qolaısyz bolýy tıis. Qandaı da bir zań shyqsa, ony aınalyp ótetin joldar árqashan bolady. Sol sebepten bunda naqty qazirgi tańda osy zańnan keıin búkil zańsyz baıyǵan sheneýnikter áshkerelenedi degenge ózim kúmándanamyn», – dedi advokat Jandos Tuıaqov.

Tabys pen múlikti jarıalaýdy Qarjy mınıstrligi kezeń-kezeńimen engizemiz dep josparlaýda. 2020-dan ári qaraı 5 jyldyń ishinde deklarasıalaýdy jalpy halyqtyq sıpatqa jetkizbek. Qyrýar qarjy bólip qolǵa alynǵan bastama orta joldan ózgerip, myń qubylyp sala bermese bolǵany.

Usynǵan: Farıza Jomartqyzy