Jańa Zelandıadaǵy meshitte atys jasaǵan lańkestiń qolynan qarýdy tartyp alýǵa tyrysqan kezde qaza bolǵan Pákistan azamaty Naım Rashıdti erligi úshin marapattamaqshy dep habarlaıdy Qamshy.kz aqparat agenttigi ♦RIA Novostıge silteme jasap. 

Er adam lańkes An-Nýr meshitine kirgen kezde onyń qolynan tapanshany tartyp almaq bolyp lańkeske tap bergen. Biraq lańkes ony atyp óltirgen.

"Pákistan eli azamaty aq násildi lańkesti toqtatýǵa tyrysyp jatqan kezinde qaza bolǵan  Mıan Naım Rashıdpen maqtanady, sol erligi úshin oǵan memlekettik marapat beriledi", - dep jazdy Pákistan premer-mınıstri Imran Han Twitter-de.

Pákistan Syrtqy ister mınıstrliginiń málimetteri boıynsha, Jańa Zelandıadaǵy lańkestik shabýylda qaza tapqan pákistandyqtyń sany - 9. 

"Kraıscherchtegi terakt kezinde qaıtys bolǵan Pákistan azamattarynyń otbasyna kez kelgen qoldaý kórsetýge daıynbyz", - dedi premer-mınıstr. 

Juma kúni, ıaǵnı  2019 jyly 15 naýryzda  Jańa Zelandıadaǵy Kraıscherchte (Ońtústik aral) eki meshitte atys bolyp, sonyń saldarynan 50 adam qaza tapty, taǵy 50-i túrli jaraqattar aldy. Eldiń Premer-mınıstri bul oqıǵanyń terakt ekenin aıtty. 

28 jastaǵy Brenton Tarrant adam óltirgeni úshin aıyptalyp jatyr, senbide sot ony 5 sáýirge deıin abaqtyǵa qamady. 

Usynǵan: Maqpal Sembaı