Depýtattar Konstıtýsıaǵa elordanyń ataýyn ózgertý týraly túzetý engizdi, dep jazady Qamshy.kz aqparat agenttigi sputniknews.kz saıtynyń deregine súıenip.

Úsh jyl buryn Qazaqstannyń tuńǵysh prezıdenti Nursultan Nazarbaev elordaǵa óziniń esimin berý týraly usynystan bas tartty.

2016 jyldyń qarasha aıynda parlament depýtattary Astanany Nursultan dep ataý bastamasyn kótergen bolatyn.

"Bul týraly talaı aıtqanmyn. Men aıtqyzyp otyr dep oılaıtyn shyǵarsyzdar. Nur, Nurly dep jazyp jatyr. Keshe parlament Astanany meniń atymmen ataýdy usyndy. Óz basym mundaı bastama kótergen de, aıtqan da emespin", - dedi Elbasy osydan úsh jyl buryn.

Sol kezde Nursultan Nazarbaev ózine reforma júrgizýge kómektesken áriptesteri men jaqtastaryna alǵysyn bildirgen edi.

"Adam retinde rıza boldym. Parlament – bıliktiń jeke tarmaǵy. Olardyń sheshim qabyldaýǵa, pikirin bildirýge quqyǵy bar. Qalalardyń, eldi mekenderdiń ataýyn ózgertýdi jáne taǵy basqa kez kelgen máseleni bárimiz aqyldasyp, memleket úshin, el úshin ne mańyzdy degen kózqaras turǵysynan qarastyryp, sheshim qabyldaımyz", - dep Elbasy Astana ataýyn Nazarbaev dep ózgertýge qarsylyq bildirdi.

Budan buryn Astana qalasyna Qazaqstannyń tuńǵysh prezıdentiniń esimin berý týraly usynys Qazaqstan táýelsizdiginiń 25 jyldyǵyna oraı deklarasıa qabyldaý boıynsha ótken parlament palatalarynyń birlesken otyrysy kezinde jasalǵan bolatyn.

Aıta ketsek, búgin 20 naýryzda ótken birlesken otyrysta parlament músheleri biraýyzdan qabyldaǵan Qazaqstan Konstıtýsıasyna engiziletin túzetýlerge sáıkes elorda ataýyn ózgertý referendýmsyz júrgiziletin boldy.

Nursultan Nazarbaevtyń qurmetine Astanada birqatar nysandar atalǵan. Halyqaralyq áýejaıǵa Nursultan Nazarbaevtyń esimi berilgen, 2017 jyly Almatydaǵy burynǵy Fýrmanov kóshesiniń ataýy da Nazarbaev dańǵyly bolyp ózgertildi.

Usynǵan: Nazerke Labıhan