Ulttyq ekonomıka mınıstri Rýslan Dálenov elorda ataýyn ózgertýge qansha teńge jumsalatyny ázirge belgisiz ekenin aıtty, dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

Dálenovtiń aıtýynsha, elorda ataýyn ózgertýge qansha aqsha jumsalatyny áli belgisiz. 

"Eseptegen joqpyz, biraq qolda bar aqshanyń, búdjettiń sheginde dep oılaımyn", - dedi mınıstr parlament palatalarynyń birlesken otyrysynan keıin.

Ol Astana ataýyn ózgertýge jumsalatyn qarjy somasy keıin jeke habarlanatynyn aıtty.

"Túsinesizder me, ataýdy ózgertý birden bola salatyn dúnıe emes. Eger qujat, tólqujat, mańdaıshalardaǵy ataýlardy surap tursańyzdar, munyń bári josparly tártippen júzege asyrylady", - dedi mınıstr.

Aıta ketsek, búgin parlament palatalarynyń birlesken otyrysy ótip, depýtattar Astananyń ataýyn Nursultan dep ózgertýge baǵyttalǵan, Qazaqstan Konstıtýsıasyna ózgerister engizý týraly zań jobasyn eki oqylymda da maquldady.

Usynǵan: Maqpal Sembaı