QR Ádilet mınıstri Marat Beketaev elorda ataýynyń ózgerýine baılanysty qujattardy aýystyrý máselesine qatysty túsinik berdi, dep habarlaıdy Qamshy.kz aqparat agenttigi QazAqparat saıtyna silteme jasap.

«Kýálik qujattar, mysaly, týý týraly kýálik, dıplomdar, júrgizýshilik kýálikterdi qazirden bastap shuǵyl aýystyrýdyń qajeti joq. Bul qujattar tıisti belgilengen merzimi boıynsha, ıaǵnı aýystyrý ýaqyty jetken kezde óziniń kezegimen aýystyrylady», - dedi Marat Beketaev QR Parlamenti palatalarynyń birlesken otyrysynan keıin.

"Bul ómir, ózgeris aqylǵa qonymdy merzimde jasalady. Tarıhta ataýy ózgergen qalalar az emes, bári bir túnniń ishinde aýysyp ketken joq. Aqylǵa qonymdy ýaqyt ishinde bári aýystyrylady", - dedi ádilet mınıstri.

Budan buryn habarlanǵandaı, Parlament elordanyń ataýyn Nursultan qalasyna ózgertý týraly qujatty qabyldady.

Usynǵan: Maqpal Sembaı