Kópirden sekirgen atyraýlyqty qutqarmaq bolyp qaıtys bolǵan polısıa qyzmetkeri otbasynyń jalǵyz asyraýshysy bolǵan dep habarlaıdy Qamshy.kz aqparat agenttigi tengrinews.kz saıtyna silteme jasaı otyryp.
Polısıa qymetkeri Shalqar Aqymǵalıev bar bolǵany 24 jasta bolǵan. IIM-niń habarlaýy boıynsha Shalqar kópbalaly otbasynan shyqqan jáne úılenbegen. Otbasynda jalǵyz jumys isteıtin de Shalqar eken. Eger bul jaǵdaı oryn almaǵanda, Shalqar sáýir aıynda 25 jasqa tolar edi. Ol osy salada 5jyl qyzmet atqarǵan.
"21 naýryz kúni saǵat 21:52-de polısıaǵa ortalyq kópirde bir adamnyń sýǵa sekirmek bolǵanyn habarlady. Atyraý qalasynyń polısıa qyzmetkerleri dereý oqıǵa ornyna jetken. Solardyń ishinde Shalqar Aqymǵalıev te boldy. Ol qyzdy qutqarmaq bolǵandy muzdy sýǵa batyp, qaıtys boldy. " - deıdi İshki ister mınıstrliginiń resmı ókili Nurdılda Oraz.
«Jaǵalaýda rolıkpen serýendegennen keıin demalyp otyrǵanda sýısıdke tosynnan kýá boldyq. Men birden polısıaǵa habarladym. Sanaýly sekýndtar ishinde oqıǵa ornyna jetken polısıa qyzmetkerleriniń biri batyp bara jatqan adamǵa tez júzip bardy. Sý muzdaı, oǵan qosa qatty aǵys qyzdy qalaı aǵyzyp bara jatqany da kórinip turdy. Biraq, polısıa qyzmetkeri óz ómirin táýekelge tigip, batqan adamdy qutqarýǵa talpynysyn toqtatqan joq», deıdi oqıǵa kýágeri Raıymbek Sarbalın.
Shalqarǵa kómekke ózimen birge bóreneni alyp sýǵa túsken polısıa kishi leıtenanty Rústembek Súndetov umtylǵan. «Sýǵa batqan adamǵa jetken kezimde Shalqar aǵysqa tótep bere almaı batyp ketti. Áıeldi qutqarý mańyzdy boldy. Onyń ústine áıel «ol men úshin óldi» dep aıqaılap, esti shyǵardy», dep eske alady Rústembek Súndetov.
Ajaldan qutqarylǵan Batys Qazaqstan oblysynyń týmasy jedel járdem kóligimen oblystyq aýrýhanasynyń reanımasıa bólimshesine jetkizilgen. Al Rústembektiń áriptesin óz betinshe izdeýi esh nátıje bermedi. 3 gradýs muzdaı sýda sińiri tartylǵan 30 jastaǵy kishi leıtenant Súndetov jaǵaǵa ózi júzip jetken. «00-50-de Shalqar Aqymǵalıevtiń múrdesi oqıǵa ornynan tómen jaqtan tabylyp, jaǵaǵa shyǵaryldy.
Usynǵan: Farıza Jomartqyzy
