"Nursultan Ábishuly meniń ónerimdi, meniń ánderimdi jaqsy kóredi. Osydan týra 30 jyl buryn, ol kezde keńes kezi bolatyn, meni Almatyǵa shaqyryp alyp, ekeýmiz óner týraly uzaq sóılestik. Sol kezde men ol kisiniń ánge, ónerge óte qushtar ekenin jaqsy túsindim.

Almatyda bolǵan meniń jeke konsertime qatysyp, bastan-aıaq tyńdady. Odan keıin jeke qonaqqa shaqyryp alyp, 4-5 saǵattaı ol kisiniń aldynda dombyramen án aıtyp, tamasha otyrys bolǵan edi. Odan keıin de birneshe ret jolyqtyq.

Ol kisiniń 60 jyldyq mereıtoıynda Úshqońyr jaılaýyna bardyq. Sonda meni jeke shaqyryp alyp, «Alteke, osy Úshqońyr jaıly án jazsaq qaıtedi» dep usynys jasady. Bizdiń sol ánimizdi halyq óte jaqsy qabyldady. Halyq áni dep te júredi el aýzynda. Sol úshin ózimdi baqytty azamat, baqytty kompozıtor sanaımyn. Odan soń Saryarqa jaıly óleń jazdyq. Onyń da ánin Nursultan Ábishuly jazdy.

Byltyr tuńǵysh ret oraza ustap, aýyz bekittim. Sol kezde Elbasy Astanada aýyz bekitken 350 musylman qaýymyna aýyzashar berdi. Sonda Elbasynyń janynda otyrdym. Aman-sálemnen keıin ol kisi «Alteke, Qyzylsaıǵa baryp turasyń ba?» dedi. "Aǵa, siz Qyzylsaıdy qaıdan bilesiz?" dep suradym. "Seniń ánderińniń ishinde Qyzylsaı týraly aıtylady emes pe?" El-jurt qalaı dep suraǵan soń elim, jerim jaıly aıtyp berdim. Ol kisiniń este saqtaý qabileti tańǵalarlyq. Birde «Alteke, Kózińnen aınalaıyn» degen ánińdi oryndashy degen soń dombyramen aıtyp shyqtym. Sóıtsem, bir-eki shýmaǵyn aıtýdy umytyp ketippin. Sodan ol kisi meniń dombyramdy alyp, ózi qońyr daýymen aıtyp shyqty.

Bir apta buryn Elbasy óz ornyn Qasym-Jomart Kemelulyna berdi. Munyń bári shynynda biz kútpegen jaǵdaı edi. Bárimiz tańǵaldyq. Kádimgi taý qulap ketkendeı ózim bir sondaı tańǵalysta boldym. Endi Nurekeń kemeńger, aqyldy adam ǵoı. Jasy kelgenin moıyndaǵysy keldi ma, astyndaǵy taǵyn Qasym-Jomart Kemelulyna usyndy. Zańdylyq ta shyǵar.

Elbasynyń qazaq eli, qazaq úshin kúndiz kúlmeı, túndeı uıyqtamaı eńbek etkenin bilemiz. 100-den astam ulys búginge deıin osynaý barmaqtaı ǵana qazaq jerinde tatý-tátti ǵumyr keshtik. Astanany salǵyzdy. Saryarqanyń tórindegi Astananyń saıası da, aýmaqtyq da mańyzy zor ekenin bilemiz. Onyń árbir kirpishine deıin ol kisiniń eńbegi sińdi. Elbasynyń Astananyń árbir kóshesi men kirpishine deıin jobaladym degen sózi bar. 20 jyldyń ishinde Astana gúl jaınap, álemdegi eń bir kórkem qalaǵa aınaldy. Oǵan búkil halyq kýá.

Qasym-Jomart Kemelulynyń eń birinshi bergen buıryǵy Elbasynyń keýdesine Altyn juldyz taqty. Ol da jarasymdy. Odan keıin Astananyń atyn Nursultan dep ózgertý jaıly sheshim shyǵaryldy. Bul endi álemdik tájirıbede bar nárse. Sondyqtan bizdiń de az ýaqytta úırenip ketetinimizge senimdimin. Azamat retinde árıne men Astananyń Nursultan dep ózgertilýin qoldaımyn. Qutty bolsyn!"

Altynbek QORAZBAIULY, Qazaqstannyń halyq ártisi.

Usynǵan: Ásel DAǴJAN.