Eki kún qatarynan Kremlde konsertin bergen Dımashqa tyńdarmandarynyń biri dál ózindeı qýyrshaq syıǵa tartty dep habarlaıdy Qamshy.kz aqparat agenttigi.
Dımashtyń Reseıdegi jankúıerleriniń biri, Saha (Iakýtıa) eliniń qolóner sheberine súıikti ánshisiniń beınesindegi qýyrshaqty jasaýǵa tapsyrys bergen eken.
Qolóner sheberiniń aıtýyna qaraǵanda, ol qýyrshaqty jańa jyldyń aldynda jasap bastaǵan eken. "Lena esimdi Dımashtyń jankúıeri Dımash Qudaıbergenniń sýretine qarap, qýyrshaǵyn jasaı alasyz ba dep surady. Sýretin jibershi dedim. Sýretin kórip, bet álpeti óte symbatty eken. Op-ońaı jasaımyn dep oıladym. Sóıtsem, qatelesippin. Dımashtyń qýyrshaǵyn jasaý barysynda bet álpetin úsh ret aýystyrýǵa týra keldi. Jumys barysy tym uzaqqa sozylyp ketti. Qýyrshaqty qysta Máskeýde jasap bastadym da, sonaý Balı araldarynda áreń bitirdim. Tipti, buǵan deıin qýyrshaqtarymdy kúıdirip júrgen peshim de isten shyǵyp, jańasyn satyp aldym. Jáne eń tań qalatyny dál men turatyn Ýbýdede mata satatyn dúken joq bolyp shyqty. Aınaladaǵy barlyq mata satatyn dúkenderdi aralap shyqtyq. Bári de birdeı. Eshbir jerde maǵan qajetti mata joq. Sóıtip, ınstagram jelisinde qýyrshaqtarǵa kıim tigetin qolóner sheberinen men turatyn aımaqqa jaqyn mańdaǵy Denpasar atty qalada mata satatynyn bildim. Sóıtip, keshtetip, bir kósheniń bári mata dúkenderine toly Denpasar qalasyna da jettik. Sóıtsek, kesh barǵan ekenbiz, dúkender jabylyp qalypty. Sosyn ánshiniń kıimindegideı órnekterdi tigip, tastarmen bezendirý úshin asaı-múseı satatyn dúken izdep shabyldyq.
Dál sol kúni keshte Reseıden tapsyrys bergen qýyrshaqqa laıyqty, túsi dál keletin qozynyń júni keldi. Tym quryǵanda, osyda jolym boldy. Mundaı bolaryn bilgende bárin aldyn-ala Reseıden tapsyrys berer edim. Dál osyndaı ádemi jerden keregińdi tappaısyń dep kim oılaǵan dersiń?
Qýyrshaq daıyn. Betin boıadym, shashyn jabystyrdym, kostúmi tigildi, aıaq kıimi de daıyn. Biraq birnárse jetispeı turdy. Joldasym jergilikti jerde tanysqan sýretshini esime túsirdi. Sóıtip, álgi sýretshi sýret ónerine qajetti zattar satatyn dostarynyń dúkenin aıtty. Dál sol jerden kostúmine qajetti jyltyrdy taptym.
Sosyn baqytyma oraı enem zattarynyń ishinen altyn tústes jip pen órnek taýyp aldy. Kishigirim ǵajaıyp dersiń.
Qýyrshaqtyń shashyn qıý úshin jergilikti shashtarazǵa baryp, ótkir qaıshysyn suraýymyzǵa týra keldi.
Sosyn qýyrshaqty Máskeýge ózimen birge ala ketýge kelisim bergen adamdy taptyq. Tapsyrysty tym erte alyp ketetindikten, kúndiz durystap sýretke túsirip te úlgermedik. Sóıtip, ymyrt kire Dımashtyń qýyrshaǵyna kóterip alyp, sýretke túsiretin ádemi jer izdep aınalany sharladyq. Jergilikti turǵyndar kishkentaı Dımashtyń fotosessıasyna qyzyǵa qarap júrdi.
Bul qıyndyqtardy oqý sizder úshin qyzyq shyǵar. Biraq bul synaq bóten elde júrgen adam úshin Balıdi jaqsy tanýǵa kóp septigin tıgizgen synaq boldy.
Osy jazbammen maǵan senim artyp, qýyrshaqqa tapsyrys bergen Lena men barlyq fan klýbtarǵa alǵysymdy bildirgim keledi. Bul tájirıbe maǵan ómirlik sabaq boldy. Daryndy Dımashtyń ónerimen tanysqanyma óte qýanyshtymyn» dep jazdy qolóner sheberi óziniń ınstagramdaǵy paraqshasynda.
Iakýtıalyq qolóner sheberi "Tapsyrysty jibermes buryn Dımashpen sýretke túsip úlgerdim" dep qýyrshaqpen túsken sýretin de salǵan eken jeke paraqshasynda.
Usynǵan: Maqpal Sembaı
Pikir qaldyrý