Darıǵa Nazarbaevanyń jańa qyzmetindegi alǵashqy tapsyrmasyn berdi dep jazady Qamshy.kz aqparat agenttigi Senattyń baspasóz qyzmetiniń deregin negizge ala otyryp. Búgin senat spıkeriniń tóraǵalyǵymen joǵary palata búrosynyń otyrysy ótti. Búro músheleri tómengi palatadan kelip túsken zań jobalaryn bólip aldy. 

Qarjy jáne búdjet jónindegi komıtet «Qazaqstan Respýblıkasynyń Ulttyq qorynan 2019-2021 jyldarǵa arnalǵan kepildendirilgen transfert týraly» zańǵa ózgeris engizý týraly» jáne «2019-2021 jyldarǵa arnalǵan respýblıkalyq búdjet týraly» zańǵa ózgerister men tolyqtyrýlar engizý týraly» zań jobalary boıynsha bas komıtet bolyp belgilendi. Halyqaralyq qatynastar, qorǵanys jáne qaýipsizdik komıteti «Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy Óteýsiz áskerı-tehnıkalyq kómek kórsetý týraly kelisimdi ratıfıkasıalaý týraly» zań jobasyn odan ári pysyqtaıtyn boldy.

«Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasyna Ekonomıkalyq saıasat, ınovasıalyq damý jáne kásipkerlik komıteti jaýapty bolyp belgilendi.

Búro otyrysynda Parlament Senatynyń 28 naýryzda bolatyn otyrysynyń kún tártibine Qazaqstan Respýblıkasy Parlamenti Senaty depýtaty Q.Qojamjarovtyń ant berýi jáne ony Senattyń turaqty komıtetiniń quramyna saılaý týraly; Senattyń Halyqaralyq qatynastar, qorǵanys jáne qaýipsizdik turaqty komıtetiniń tóraǵasyn saılaý týraly máselelerdi engizý usynyldy.

Parlament joǵarǵy palatasynyń Tóraǵasy Darıǵa Nazarbaeva 4 sáýirde bolatyn otyrysta qaralatyn respýblıkalyq búdjetke túzetýlerge áriptesteriniń erekshe nazaryn aýdardy. Senat basshysy palatanyń turaqty komıtetteriniń tóraǵalaryna komıtet otyrystarynda osy máseleni ýaqytynda ári jan-jaqty qaraýdy tapsyrdy.

Usynǵan: Ásel Bolatqyzy