Bul týraly búgin «Ońtústik aqparat» baspasóz ortalyǵynda BAQ ókilderine bergen brıfıńte oblystyq ishki saıasat jáne din isteri basqarmasynyń basshysy Berik Qurmanǵalı málimdedi. Qazaqstan halqy Assambleıasynyń 20 jyldyǵyna «Biz soqqan ortaq úı» taqyrybynda 3D formatta annımasıalyq fılm túsirilýde. Fılm jastardy Otandy súıýge, memlekettik tildiń nasıhattalýyna jáne halyqtar arasynda yntymaqtastyq pen dostyq baılanysty nyǵaıtýǵa úgitteıdi. Atalǵan fılmdi 1 maýsym ‒ Halyqaralyq balalardy qorǵaý kúni jaryqqa shyǵarý josparlanýda,‒ dedi basqarma basshysy. ‒ Basqarmanyń negizgi mindetteriniń biri ‒ QR Prezıdenti N.Nazarbaevtyń Qazaqstan halqyna «Nurly jol - bolashaqqa bastar jol» Joldaýyn nasıhattaý bolyp tabylady. Osy oraıda aqparattyq-toptardyń jumysyna barlyǵy 400 myńnan astam adam qamtylyp, buqaralyq aqparat quraldarynda 800-ge jýyq maqala jaryq kórdi,‒ dedi B.Qurmanǵalı. Basqarma basshysynyń aıtýynsha, Jeńistiń 70 jyldyǵyna ulttyq naqyshty aıqyndaıtyn 15 myń dana Jeńis lentasyn shyǵaryp, taratqan. Jeńis kúni «Dańq» memorıalynda ótken sharada «Otyrar» telearnasymen birlese «Máńgilik dańq» sherýin uıymdastyrǵan. Sondaı-aq, atalǵan dataǵa oraı basqarmanyń tapsyrysymen óńirden attanǵan batyrlardyń ómir joly men soǵys ardagerleriniń erligi baıandalǵan qysqa metrajdy «Maıdangerler» fılmi túsirilip, kórermenge usynyldy. Baspasóz máslıhatynda basqarma basshysy aldaǵy ýaqytta el birligin nyǵaıtýda oblys ákimi janyndaǵy «Yrys aldy ‒ yntymaq» qoǵamdyq forýmy, otbasy qundylyqtardy arttyrý úshin «Mereıli otbasy» ulttyq baıqaýy jáne patrıotızmdi qalyptastyrý maqsatynda «Meniń Qazaqstanym» patrıottar forýmy ótkiziletinin aıtsa, dinaralyq tatýlyqty saqtaý baǵytynda respýblıkalyq semınarlar men ǵylymı konferensıalar jáne buqaralyq aqparat quraldarymen respýblıkalyq semınarlar, onyń ishinde «Aımaqtyq jýrnalıser forýmyn» ótkizý josparlanǵanyn tilge tıek etti. Ideologıa salasynda atqarylyp jatqan jumystar jóninde keńinen baıandaǵan Berik Ýálıuly baılanys jáne aqparat qyzmetkerleri kúnine baılanysty buqaralyq aqparat quraldaryndaǵy úzdik maqala men beınesújetterge konkýrs jarıalaǵanyn aıtyp, sol baıqaýǵa BAQ ókilderin belsene qatysýǵa shaqyrdy. Brıfıń sońynda B.Qurmanǵalı jýrnalıser tarapynan qoıylǵan suraqtarǵa jaýap berdi.