Kınkı prefektýrasynyń ańyzy

Tadjıma elindegi Djoýgahana taýynda Igakı degen saraı bar. Qaı patshadan qalǵan saraı ekeni belgisiz, áıteýir sonda Djındjúroý degen samýraı turǵan eken. Óz zamanynda ımperatorǵa adal qyzmet etken dańqty samýraı bolypty. Imperator da Djındjúroýǵa senim artyp, oǵan únemi iri isterdi tapsyrady eken. Djındjúroýdy kóre almaǵan ózge samýraılar «Biz turǵanda buny nege sonsha áspetteıdi. Búkil dańq ta, syı-qurmet te Djındjúroýdiki» dep únemi qyzǵanyp júripti. Sodan olar birinen soń biri ımperatorǵa kirip Djındjúroýdy jamandaı beripti. Alǵashynda olardyń sózin tyńdamaǵan ımperator birte-birte Djındjúroýdyń adaldyǵyna kúmán keltire bastaıdy. Bir kúni bir samýraı ımperatorǵa baryp:

— Djındjúroý qazynaǵa qol saldy, — deıdi.

Imperator Djındjúroýdy darǵa asýdy buıyrady.

Djındjúroý «Jaqsy, biraq basymdy ózenge tasta», — deıdi. Sóıtip, jazalanǵan Djındjúroýdyń basy Takınoıa ózenine tastalady. Biraq bir qyzyǵy bas sýǵa batyp ketpeı, aǵysqa qarsy júzgenin kórgen jurttyń tańqalysynda shek bolmapty. Bireý tas laqtyrǵan eken. Djındjúroýdyń basy kózi baqyraıyp, zor ekpinmen órge qaraı júzip barady deıdi. Bul ózen birneshe aýyldan aǵyp ótedi. Basy taýdan bastalady eken. Samýraıdyń basy taýdaǵy bulaqqa deıin jetip, jeti kún boıy ózinen ózi aınalyp turyp alypty deıdi. Sodan sol jer Nanakamegýrı (Jeti aınalym) dep atalatyn bolypty. Segizinshi kúni samýraıdyń basy Ooıa darıasyna deıin aǵyp baryp, sýdy órleı, dáý tastyń ústine shyǵyp, saraıǵa tesile qarap qalǵan eken. Asaý tolqyndar ursa da bas miz baqpaı turyp alypty. Imperator saraıyna tesilgen tuńǵıyq qara kózder kórgen jurttyń júregin qan jylatypty. Aýyl halqy eńirep júrip Samýraıdyń basyn Kavara degen jerge kómgen eken. Djındjúroýdyń kinásizdigine kózi jetken Imperator ah uryp, samýraıdyń qurmetine Gorın munarasyn saldyrypty deıdi.

Japon tilinen aýdarǵan

Sharafat Jylqybaeva