Qazaqstannyń eńbek sińirgen ánshisi Nurlan Ónerbaev Dımash týraly pikiri bildirdi dep jazady Qamshy.kz aqparat agenttigi. Bul týraly ol óziniń Instagram paraqshasyna jazdy.
"Taǵy bir jańa bıik. Taǵy bir jańa beles. Qudaı beresalǵan Dımash Qudaıbergenniń Máskeýdegi ótken konsertinen keıingi oı. Án álemindegi buǵan deıin eshbir ánshi jete almaǵan bıikti,eshbir ánshi asa almaǵan asýdy bizdiń Dımashymyz jetip qana qoıǵan joq, ol odan asyp tústi. "Bárekeldi!" - deımiz. Osyndaı uldyń ózińnen shyqqanyna jáne qazaq bolǵanyna,qazaq bolǵanda da qany bar,namysy bar qazaq bolǵanynan aınalyp ketpeısiń be, aǵaıyn. Qashannan eldiń, jerdiń atyn shyǵaratyn da áıgileıtin de sol eldiń óneri men mádenıeti,tarıhy bolǵan. Tereń tarıhy men baı mádenıetin álemge óneri arqyly tanytyp kele jatqan Dımash ulymyzdyń boıyna kórikti, bıazylyqty, mádenıettilikti, ónerdi, asqaq úndi Jaratýshymyz qazaqy minezben qosyp namysty qylyp aıamaı aq bergen eken. Kómeıine bulbul uıa salǵan degen teńeý Dımashqa ǵana laıyq dep sanaımyn. Óner adamy retinde biletinim, ándi árkim aq aıtady, áńgime ol, ándi qalaı aıtqanynda, qalaı oryndaǵanynda. Dımash, daýys qabiletiniń, ún áýezdiliginiń deńgeıin búginge deıin eshkim jete almaǵan bıikke kóterip tastady. Bul bes qurlyq tyńdarmandary moıyndaǵan álemdik qubylys ekenine qýanýymyz kerek. Endi budan keıin ánshiniń oryndaýshylyq qabiletine baǵa bererde, saraptama jasarda kóp aqylgóıler oılanyp sóıler bolar. Atam qazaq qashannan bulaq kórse kózin ashqan. Kókke umtylǵannyń kómeıin tyǵyndamaı,eteginen keıin tartyp jigerin janshymaǵan. Biz bir-birimizdi demesek qana,bir-birimizge dem berip kótermelesek qana irgeli el bolamyz. Qazaq eliniń,qazaq óneriniń, qazaq ániniń kezekti jeńisi qutty bolsyn! Sol jeńisti eline jetkizgen Dımashtaı ulymyz aman bolsyn! Jeńisti de jemisti kúnderi kóp bolsyn ónerpazymyzdyń", - dep jazdy Nurlan Ónerbaev.
Atalmysh jazbany oqyǵan Dımash Qudaıbergen Nurlan Ónerbaevqa alǵysyn bildirdi.
Usynǵan: Ásel Bolatqyzy
