Dımashty reseılik operatorlar eshkige teńep, balaǵattady dep jazady Qamshy.kz aqparat agenttigi. 24 naýryzda Dımash "Ne? Qaıda? Qashan?"  reseılik telebaǵdarlamasynda óner kórsetti. Atalmysh baǵdarlamada Dımash "Mademoiselle Hyde" ánin aıtyp, reseılikterdi tánti etken bolatyn. 

Al kelesi kúni, ıaǵnı 25 naýryzda Dımash án aıtqan kezdegi operatorlardyń jumys istep jatqan vıdeosy kópshiliktiń qyzý talqysyna tústi. Negizi operatorlardyń jumysyn jankúıerler joǵary baǵalady. Alaıda  operatordyń  Dımashty balaǵattaýy jankúıerlerdiń ashýyna tıdi. 

Dımash án aıtyp jatqan kezde onyń kóleńkesi Igor Krýtoıǵa  túsip turady. Sol sátte operatorlardyń biri "Myna eshkiniń oǵan kóleńkesi túsip tur" (Temnıt etot kozól na nego — red.) dep aıtyp qaldy. 

Vıdeony 40 myńnan astam adam kórip, 200-den astam pikir jazǵan. Kópshilik azamattar teleoperatordyń keshirim suraý kerektigin talap etýde.

"Barlyǵy keremet, árıne. Alaıda Dımashty eshkige teńeý – soraqylyq. Ótinish, qyzmetkerlerińizdi durystap tárbıeleńizder. Mıllıondaǵan adamnyń kýmırine aınalǵan adam týraly osylaı deýge bola ma?",- dep pikir bildirdi Dımashtyń Pıterdegi jankúıeri Soná Abramám.

– Ashýymdy basa almaı otyrmyn. Baǵdarlamany taǵy da qarap shyqtym. Dımashtyń kóleńkesi Igor Krýtoıǵa túsip tur. Telearna ákimshiligine aryz jazý kerek. Operator aıtqan sózi úshin jaýap bersin, - dep jazdy Gúlnár esimdi áleýmettik jeli qoldanýshysy. 

Jalpy Qytaı elinde konserttik baǵdarlamalardyń tynysh ótetini belgili. Olar Dımashty balaǵattamaq túgili, bir aýyz jaman pikir aıtqanyn da estimeppiz. Al Reseıde bári kerisinshe. Dımash án aıtqan kezde mıkrofon isten shyǵady nemese taǵy soǵan uqsas yńǵaısyz jaıttar oryn alady. Jaraıdy, tehnıka bolǵan soń onyń istemeı qalýy qalypty jaıt. Buǵan belgili bir adamdy aıyptap, synaı almaspyz. Al "Ne? Qaıda? Qashan?" baǵdarlamasynda bolǵan tárbıesiz ári jaǵymsyz oqıǵaǵa  belgili bir adamdar jaýap berýi qajet. Árıne parasatty azamat  Dımashtyń daý shyǵaryp, "keshirim sura" dep talap etpeıtini belgili. Sebebi Dımash — tárbıe kórgen  qazaqtyń  balasy. Qanshama mıllıardtaǵan kórermenniń kýmırine aınalsa da "men  qarapaıym adammyn" deýden jalyqqan emes. Onyń ornynda basqa ánshi bolsa baıaǵyda-aq telearna basshylaryna talap aryz túsirer edi. Dımash týraly qandaı da bir jaǵymsyz pikir aıtqan adam mıllıardtaǵan adamnyń talqysyna túsip, "jaýyna" aınalady.  Sondyqtan Dımash aryzdanbasa da, onyń jankúıerleri telearna qyzmetkerlerinen atalǵan jaǵymsyz jaıtqa qatysty jaýap kútedi. 

Iá, reseılik teleoperatorlar da mıllıardtaǵan adamnyń kýmırine aınalǵan Dımashty syılaýy kerek. Múmkin olar bul jaıtty qalypty dep túsiner. Biraq  Dımash álem baǵalaǵan qazaqtyń talantty ánshisi. Sondyqtan reseılik teleoperatorlar  Dımashty da, onyń shynaıy jankúıerlerin de syılaǵany jón.