Qorǵanys mınıstrligi Jalaǵash aýdanynda MI-8 tikushaǵynyń qulaýyna qatysty boljam jasady.

Qazaqstannyń áskerı-áýe kúshteriniń qolbasshysy, avıasıa general-maıory Dáýren Qosanov tikushaqtyń qulaýyna sebep bolǵan 3 negizgi faktordy atady, dep habarlaıdy Qamshy.kz aqparat agenttigi Sputnik Qazaqstan saıtynyń deregine súıenip.

Avıasıa general-maıorynyń aıtýynsha, apatqa ushyraǵan MI-8 tikushaǵy 1988 jyly qurastylypty.

"Ol Almaty qalasyndaǵy №405 avıajóndeý zaýytynda kúrdeli jóndeýden ótti. Zaýyttan shyqqannan keıin tikushaqqa áýede 2000 saǵat nemese 8 jyl ushý múmkindigi beriledi. Búginge deıin tikushaq áýede 773 saǵat ushqan. Tikushaqta tehnıkalyq aqaý bolmaǵan. Memlekettik komısıa tergeý júrgip jatqanyna baılanysty Qazaqstannyń Qarýly kúshterine tıesili MI-8 tikushaqtarynyń ushýy toqtatyldy. Apta boıy olar tehnıkalyq tekseristen ótedi", - dedi Dáýren Qosanov ortalyq komýnıkasıalar qyzmetinde ótken brıfıńte.

Budan bólek, Qazaqstannyń áskerı-áýe kúshteriniń qolbasshysy aıtqandaı, MI-8 - postkeńestik elderde ǵana emes, búkil álemde adam eń kóp sıatyn tikushaq.

"Bul – senimdi tikushaq. Qazir MI-17 jáne MI-171 tikushaǵymen birge MI-35 jaýyngerlik tikushaǵyn satyp alyp jatyrmyz", - dedi avıasıa general-maıory.

Sóz sońynda ol memlekettik komısıa tergeý júrgizip jatqanyn atap ótti.

"Barlyq sebep saralanyp jatyr: tehnıkanyń istemeı qalýy, adamı faktor jáne meteo jaǵdaı. Men komısıa múshesi emespin. Sol sebepti pikir bildirýge quqyǵym joq. Qara jáshik memlekettik komısıada. Ony biz teksere almaımyz. Tergeýdiń nátıjesi resmı túrde habarlanady", - dep túıindedi sózin Dáýren Qosanov.

Eske sala ketsek, 27 naýryzda keshke Qyzylorda oblysy Jalaǵash aýdanynda MI-8 tikushaǵy apatqa ushyrady. Áýe kemesi belgisiz sebeptermen qulap, túgi qalmaı janyp ketken. Áskerı tikushaqtyń bortynda 13 adam boldy, olardyń bári qaza tapty.

Usynǵan: Nazerke Labıhan