Qazaq shoý-bıznesiniń tartymdy jigiti, kóptegen qyzdardyń armanyna aınalǵan, juldyzdar arasyndaǵy sportshylardyń biri Taýekel Músilim 1show.kz jýrnalyna bergen suhbatynda ómirlik talabymen de talǵamymen de bólisti.
- Telearnaǵa deıingi ómirińiz jaıly biraz baıandap berseńiz?
- Meniń otbasym úlken emes. Ózim jáne ápkem. Búginde ápkem turmys qurǵan, elordasy Astana qalasynda turyp jatyr. Al anam ekeýimiz Almaty qalasynda tirshiligimizdi jasap jatyrmyz. Bilim jolyna keletin bolsaq, Muqaǵalı Maqataev atyndaǵy mektepti támamdap, bakalavr mamandyǵy, ınjener-mehanık kásibi boıynsha Q. Satbaev atyndaǵy Qazaq ulttyq tehnıkalyq ýnıversıtetine oqýǵa tústim. Keıin ǵylym jolyn qýyp, magıstratýrada ilim aldym.
- Sizdiń shyǵarmashylyq jolyńyz jarnamadan bastalǵany málim, jaýapkershiligi mol kásipti ıgerý ońaı boldy ma?
- Ia, shyny kerek, bul jol kishigirim jarnamadan bastaldy. Bılbordtarǵa, foto jarnamalarǵa, ýaqyt óte kele, rolıkterge de túse bastadym. Tipti beınebaıanǵa túsip te úlgerdik. Osyndaı dárejege jetý ońaı bolǵan joq. Bastapqy júrgizgen «El arna» telearnasyndaǵy «Án arna» baǵdarlamasy boldy. Alǵash jaryqqa shyqqan túsirilimderdi qarap, birden qatelikterimdi eskerýge tyrystym. Murat Ábdelbaev sahna til jaǵynan daıyndap, sheshen sózge úıir bolýǵa kómegin tıgizgen edi. Osyndaı qıynshylyqtarmen kúresip, qazirgi tańda «Habar», «Hıt tv» arnalarynda baǵdarlama júrgizýshisi retinde tanylyp júrgen jaıym bar. Degenmen, telearnanyń qyr-syryn jetik meńgerdim, dep aıta almaımyn. Áli de eńbektenip, kúsh jumsaý qajet.
- Akterlik jolyńyzda qandaı ról kóńilińizden shyqty?
- Negizi, 2008 jyldan bastap akterlikke aıaq bastym. Shaǵyn epızodtardan kórine bastadym. Ázirshe, basty róldi somdaǵan telehıkaıanyń biri «Mahabatym júregimde». Senarıdi qolǵa alǵan sátten bastap, birden tereń úńildim. Nege deseńiz, ondaǵy Dastannyń obrazy ózimniń shynaıy ómirdegi keıpime, kózqarasyma dál keletinin túsindim. Tipti sportqa degen qumarlyǵy ózimdi aıqyn kórsetti, dep aıta alamyn. Al, aldaǵy ýaqytta er-azamatqa tán keıipkerlerdiń rólin somdaǵym keledi. Han, batyr, jaýyngerlik janrlarǵa da tántimin. Jan-jaqty damý maqsatynda kez-kelgen rólderdi oınaǵan abzal bolar. Qazir bul baǵytta ónerimdi shyńdap jatyrmyn.
- Kúndelikti ómirde qandaı stılde kıingendi unatasyz?
- Jasqa saı kıingen durys dep esepteımin. Eseıe kele, klasıkaǵa bet burýǵa týra keledi. Mańyzdy kezdesýlerge kostúm kıip, sharýalarymmen júrgen ýaqytta kejýal stılinde kıingendi unatamyn. Demalys kúnderi janyma jaqyn sporttyq úlgide kıingendi qalaımyn. Ózime jaǵymdy ıis taba almadym. Turaqty qoldanatyn ıis sýym joqtyǵyn jasyrmaımyn. Degenmen, kóńilden shyǵatyn ıis sýlar bar. Olar: Christian Dior-Absolute Fahrenheit, Cartier jáne qazir qoldanyp júrgen Bleu de Chanel. Avtokólikke keletin bolsaq, ár er jigittiń álsizdigi dep bilemin. Aldynda «toıota kamrı» minip júrdim. Keıin prodúserim Janna Abýova úlken avtokólik «jıp» satyp alyp berdi. «Jaqsyǵa tez úırenip alasyn» demekshi, atalmysh kólikten artyǵyn kezdestirmegenime senimdimin (kúlip).
- Shoý-bızneske kelýge májbúr boldyńyz ba? Álde án aıtý ónerińiz burynnan bar ma?
- Mektep qabyrǵasynda oqyp júrgen kezimde fýtbolshy nemese kásipker bolamyn degen oılar bolǵandy. Naqty bir maman ıesi bolýǵa talpynǵan emespin. Eń basty jetkilikti, óz kúnimdi kóre alsam dep, únemi oılaıtynmyn. Model bıznesine kelmes buryn, minezim óte tuıyq, uıań bolatynmyn. Kópti kórgen, kóp biletin adamdardyń arasynda júrý, men úshin bir úlken sabaq boldy. Tulǵa bolyp qalyptaýysýma biraz áserin tıgizdi, dep aıta alamyn. -bızneske kelýge eshkim májbúrlegen joq. Negizi, jastaıymnan án aıtýǵa qumarmyn. Jasóspirim kezimde «Super star.kz» baıqaýyna kúni-túni daıyndalyp, endi qatysýǵa bel býǵanda, daýsym ózgeriske ushyrady. Án jolyna kelgenime bir jyl boldy. Ánshilikke jetpeıtin qyrlarym barshylyq. Jan-tánimen án aıtyp úırený kerek. Daýys degen zor kúshke ıe ekenin túsindim. Qazir daýysty ashý ústindemiz. Bolashaqta bul salany da meńgerip, ónerimdi pash etsem deımin.
- Jańa beınebaıanyńyz qaıda túsirildi? Kóp ýaqyt aldy ma?
- Búgingi tańda qorjynymda úsh beınebaıanym bar. Barlyǵy da Almaty qalasynda túsirildi. Sońǵysyn aıtatyn bolsaq, Almaty mańaıyndaǵy belgili demalys ornyn tańdap, tań ata jumysqa kirisip, bir táýlik ýaqytymyzdy alǵan bolatyn. Sújettiń taqyrybyna baılanysty bolar, qysqy ýaqytta túsirilim jasaý qıynǵa soqty. Degenmen, jemisin kórip kelemiz.
- Toı-bızneske qatysyńyz bar ma? Sizdiń jeke kózqarasyńyz qandaı?
- Toı-bızneske esh qatysym joq. Kópshilik meni ánshi retinde qabyldaı almaı jatqany kórinedi (kúlip). Sahnadan, kameradan tys ataýly keshterge baılanysty máselelerdi Janna hanymmen sheshimge kelgen jón bolady. Degenmen, toı bızneske bet burmaımyz degen oıdamyn. Bizdiń maqsatymyz búgingi dárejeden asyp, elıtaǵa jaqyn bolý. Ol kisiniń toı-dýmanǵa arnalǵan 10-nan astam jobasy bar. Sol ortada tanylyp júrgen toptarmen tyǵyz baılanys ornatýda. Toı bıznes tabys kózi bolyp sanalatyndyqtan, óz basym kelisemin. Biraq ózim bul ortaǵa aıaq baspaımyn. Bizge altyn ýaqytyńyzdy bólip, saýaldarymyzǵa jaýap bergenińiz úshin kóp rahmet! Sizge de rahmet!
Avtor: Saltanat Gabbas
