«Aq jol» partıasynyń plenýmy prezıdenttik saılaýǵa partıa atynan túsetin úmitkerler boıynsha naqty bir sheshimge kele almady dep habarlady "Aq jol" partıasynyń baspasóz qyzmeti Qamshy.kz aqparat agenttigine.

Túrkistan, Mańǵystaý, Almaty oblystarynyń, Almaty jáne Nur-Sultan qalalarynyń ókilderi partıanyń tóraǵasyn usyndy. Alaıda, Perýashev áriptesterinen tek qana onyń kandıdatýrasymen shektelmeı, ózge úmitkerlerge múmkindik berýin surady. «Partıa lıderleriniń tizimin keńeıtý qajet» ekenin aıtyp, onyń tek bir adammen shektelmeýi tıis ekenin atap ótti. Ol saılaýǵa túsip óz múmkindigin synap kórmekshi bolǵan birneshe partıalastarymen aqyldasqanyn habarlady. Biraq olardyń aty-jónin atamady.

Perýashev óz sheshimin basqa úmitkerler anyqtalǵannan keıin qabyldaıtynyn aıtty.

Partıa tóraǵasy óz ustanymyn bildirgennen keıin, Soltústik Qazaqstan oblysy advokattar palatasynyń tóraǵasy, Petropavl qalasyndaǵy orys drama teatryna arnalǵan «Alash» pesasynyń avtory Evgenıı Kınsel óziniń kandıdatýrasyn usyndy. Sondaı-aq, «Aq jol» partıasy Jambyl oblystyq fılıalynyń tóraǵasy, Taraz qalasynyń úsh márte máslıhat depýtaty, belgili kásipker, jergilikti «Atameken» palatasyn basqarǵan Asan Qoshmambetov te nıetti ekenin jetkizdi.

Depýtat Qoshmambetovtiń óz pikiri bar ekeniń halyq jaqsy biledi. Ásirese, onyń máslıhattyń kópshiligine qarsy shyǵyp, burynǵy sheneýnikterge emes, áleýmettik jaǵdaıy tómen otbasylarǵa kómek berýdi usynǵany jóninde respýblıkalyq BAQ-ta jarıalanǵan bolatyn.

Belgili jýrnalıs Arman Sqabyluly Perýashev ózdiginen bas tartqan jaǵdaıda partıa jańa demokratıalyq dástúrdi qalyptastyrý maqsatynda áıel adamdy úmitkerlikke usynýy qajet degen oıyn bildirdi. Bul usynys áriptesterdiń arasynda ótkir pikirtalas týǵyzdy.

Nátıjesinde, úsh saǵatqa ulasqan daýdan keıin, pleným kandıdattar boıynsha naqty bir sheshimge kele almady. Ázirge belgili bolǵany, úmitkerlerdiń arasynda Kınsel men Qoshmambetovten basqa, kásipkerler, adam quqyǵy jónindegi táýelsiz sarapshy men jýrnalıs te bar.

Usynǵan: Nazerke Labıhan