21 myń teńgeni bergennen beredisi jyr boldy. Búgin Elordadaǵy kópbalaly analar taǵy bas kóterip, bul joly balalaryn súırep, mınıstrlikke ózderi bardy. Olar áleýmettik kómekke ilige almaı, memleket kómegine muqtaj ekenimizdi dáleldeýden sharshadyq dep ashyndy dep jazady Qamshy.kz aqparat agenttigi 31 arnaǵa silteme jasap.

Járdemaqyǵa ilinýimiz kerek dep tabany taýsylǵan kópbalaly analar shyǵyn men kiristi eseptep, qujatpen sandaltyp esti shyǵarǵansha sol 21 myń teńgeni barlyq balaǵa birdeı, aı saıynǵy járdemaqy etip bersin degen talap qoıýda.

Sheneýnikter járdemaqy, áleýmettik kómek, úı máselesine qatysty ýádeni úıip-tógedi, biraq úsh aı boıy kómektiń bir túrin kórmedik dep ashynǵan analar járdemaqyny tezdetip berýdi talap etip, áleýmettik qorǵaý mınıstrliginiń aldynda jınaldy.

"Qaramaı ma! Myna 8-10 balasy bar kópbalaly analarǵa nege qaramaıdy. Árbir úıge bas suǵyp qaramaı ma?" - deıdi ashynǵan kópbalaly ana Ferýza Ábizova.

Biraq, mamandardyń sózinshe, komısıa músheleri kópbalalaly otbasylardy áli tolyq aralap bitpegen soń, kesimdi sóz aıtý qıyn.

"Ýchaskelik komısıalar barlyq otbasyny aralap úlgergen joq. Sondyqtan, mynalar alady, mynalar almaıdy degen pikir aıtýǵa bolmaıdy", - dedi sarapshy maman Ǵalıa Jabaǵına.

Alaıda, mamandardyń sózine kóńili tolmaǵan analar áry qaraı depýtattarǵa jolyǵamyz dep týra tartty. Olardy májilistegi eki depýtatpen birge eldiń áleýmettik qorǵaý mınıstriniń orynbasary qarsy aldy. Janaıqaıyn jetkizýge asyqqan analardyń ishinde páter aqysyn tóleı almaı, dalada qalǵandary da bar.

Sonymen, 1-sáýirde beriletin járdemaqyǵa qujattar endi qabyldanyp jatyr degen vıse-mınıstr bári zań sheńberinde bolady dep, analardy sabyrǵa shaqyrdy. Biraq, prosedýrany rásimdeýge bir ǵana qujat jetedi degen analardyń úmiti aqtalmady.

"Qujat suratyp, jazbasha túrde ótinish jazdyrtqan jaǵdaılar boldy", - deıdi Eńbek jáne halyqty áleýmettik qorǵaý vıse-mınıstri Svetlana Jaqypova.

Vıse-mınıstr sondaı-aq, erteńnen bastap jumyspen qamtý ortalyqtaryna tikeleı ózi baryp, bárin óz kózimen kórip shyǵýǵa ýáde berdi. Alaıda, ábden kóńili qalǵan analar sheneýnikterdiń bul ýádesine senbedi.