Belsendi Jaqsybaı Bázilbaev 9 maýsymda ótetin Qazaqstandaǵy kezekten tys prezıdent saılaýyna qatysatynyn aıtty. Bul týraly ol 19 sáýirde Almatyda ótken baspasóz jıynynda málimdedi, dep jazady Qamshy.kz aqparat agenttigi Azattyq radıosynyń deregine súıenip.
Ol saılaýǵa "Qazaqstandaǵy orys qaýymdastyǵy" qoǵamdyq uıymynyń atynan túspek.
"Qazaqstandaǵy orys qaýymdastyǵy" Bázilbaevtyń uıym atynan saılaýǵa túsý nıetin "jıyn barysynda bilgen". Jıynǵa kelgen uıym ókili "bul ótinishti endi ǵana estigenderin, bir apta ishinde aqyldasyp, sheshim qabyldaıtyndaryn" aıtty.
Jıyn kezinde Bázilbaev saılaýaldy baǵdarlamasymen tanystyrdy.
- Qorǵanys qabiletin nyǵaıtýdan bastaımyn. Eýropa odaǵy men Shanhaı yntymaqtastyq uıymyn qoldaımyn. Eýrazıalyq odaq aıasynda Reseıge qorǵanys koalısıasyn qurýdy usynamyn, - dedi ol.
Bázilbaevtyń eki bettik saılaýaldy baǵdarlamasynda zeınetkerlerdi komýnaldyq tólemnen bosatý, kóp balaly analarǵa tegin baspana berý, oqý men medısınany tolyqtaı tegin etý jáne ár qalada zaýyt-fabrıka salý jospary bar.
67 jastaǵy Jaqsybaı Bázilbaev buǵan deıin tórt ret – 1998, 2005, 2011 jáne 2015 jyldary ótken Qazaqstan prezıdenti saılaýyna ózin-ózi usynǵanymen, saıası básekeniń sońǵy kezeńine jetpeı, óz erkimen shyǵyp ketken.
1998 jylǵy prezıdent saılaýynda Bázilbaev básekelesi Nursultan Nazarbaevtyń paıdasyna saılaýdan shyǵatynyn málimdegen. 19 sáýirdegi baspasóz máslıhatynda Azattyq Bázilbaevtan "Osy joly saılaýda áldebir kandıdattyń paıdasy úshin saılaýdan shyǵyp qalmaısyz ba?" degen surady.
– Shyqpaımyn. Zańda qozǵalys ne partıa atynan tússeń, sen sheshpeısiń, seni kim, qaı partıa usynady – solar sheshedi. Sondyqtan meni usynsa, túsemin, táýekel, - dep jaýap berdi ol.
Qazaqstan prezıdenti Qasym-Jomart Toqaev 9 sáýirde Qazaqstandaǵy kezekten tys prezıdent saılaýy 2019 jyldyń 9 maýsymynda ótetin aıtqan.
Qazaqstan prezıdentigine úmitkerlerdi jarıalaý 10 sáýirde bastaldy. Kandıdattardy usyný 28 sáýir 18.00-ge deıin jalǵasady. Úmitkerler 11 mamyrǵa deıin tirkeledi. Saılaýaldy úgit-nasıhat tirkeý aıaqtala sala bastalyp, saılaý kúni aıaqtalady.
Usynǵan: Nazerke Labıhan
