Vladımır Zelenskıı Ýkraına saılaýynda jeńiske jetti. Endi aldaǵy 5 jylda eldi Zelenskıı basqaratyn bolady.  Al onyń áıeli Elena birinshi ledı atandy. Ýkraınanyń birinshi ledıi týraly ne bilemiz? Qamshy.kz aqparat agenttigi Elena Zelenskaıa týraly qyzyqty aqparattardy oyrman nazaryna usynady. 

Elena 1978 jyly 16 aqpanda dúnıege kelgen. Alǵashynda onyń tegi Kıashko bolǵan. Jas jubaılar bir mektepte oqypty. Degenmen olar mektep kezinde bir-birimen múldem aralaspaǵan. Mektep bitirý keshinen keıin Zelenskıı kósheden Elenany kórip, birge fılm kórýge shaqyrady. Bul kezde Elena basqa bir jigitpen kezdesip, aralasyp júrgen edi. Biraq ol Zelenskııdi unatyp, álgi jigitpen ara qatynasyn úzedi. Olar 8 jylǵa jýyq azamattyq nekede turǵan.

"Lena únemi qashan úılenetinimiz týraly suraı beretin. Al men úılengen soń birden bala-shaǵaly bolatynymyzdy oıladym. Osy sebeppen men asyǵystyq tanytqym kelmegen", - dep eske alady Zelenskıı. 

Olar 2003 jyly otaý qurady.  Qazir olar bir qyz ben bir uldyń ata-anasy. 2004 jyly Aleksandra esimdi qyz dúnıege kelse, 2013 jyly Kırıll atty ul ómirge keledi. 

Ýkraınanyń prezıdenti Elenany jaqyn dosy retinde kóredi. Tipti olardyń romantıkalyq keshki asy da jınalys sekildi ótedi eken. 

Elena Zelenskaıanyń negizgi mamandyǵy arhıtektor bolsa da ol óz mamandyǵy boıynsha jumys istemegen. Zelenskıımen tanysqan kúnnen bastap onyń ómiri kúrt ózgere bastady. Onyń shyǵarmashylyq álemge degen qyzyǵýshylyǵy artty. Zelenskıı KVN-ge qatysqan kezde de Elena kúıeýiniń komandasyna senarı jazyp júrgen.  Sodan ol Zelenskıı basqarǵan "Kvartal-95"  stýdıasynda senarı avtory bolyp qyzmet atqarǵan. Zelenskııdáń kóptegen obrazdary Elananyń kómegi arqyly paıda bolypty. Qazir "Zeları Fısh" kompanıasynyń azdaǵan aksıasyn ıelengen. 

Bir qyzyǵy, Elena kúıeýiniń prezıdenttik saılaýǵa qatysýyna qarsylyq bildirgen. Biraq Zelenskıı naqty sheshim qabyldap, resmı málimdeme jasaǵan kúnnen bastap Elena kúıeýine qoldaý bildirip, saılaýaldy jumystarǵa qol ushyn sozǵan. Ázirge birinshi ledıdiń saıası álemde qandaı qyzmet atqaratyny belgisiz. Elenanyń ózi jýrnalıserge bergen suhbattarynda ázirge eshqandaı jospary joq ekenin, tek kúıeýine kez kelgen jaıtta qoldaý bildiretinin aıtqan.

Sondaı-aq Elena án aıtqandy jaqsy kóredi. Jasóspirim kezde ol án baıqaýlaryna qatysyp, aktrısa bolýdy armandaǵan. Ýkraınanyń birinshi ledıi kópshiliktiń ortasynda júrgendi asa unatpaıtyn kórinedi. 

"Men kópshiliktiń nazarynda júrip, rahat alatyn adamdardyń qatarynan emespin", - deıdi Elena. 

Jergilikti BAQ ókilderi qazirgi tańda Elena Zelenskııdiń kıim-kıisi men hobbıleri týraly jarysa jazýda. Elena qymbat kıingendi asa unatpaıdy eken. Ol bıik óksheli aıaq kıimnen góri sporttyq yńǵaıly aıaq kıimdi tańdaıdy. Qazirgi tańda Elena óziniń ımıjin ózgertýge tyrysyp jatqany baıqalady.