"Golos. Detı" mýzykalyq baıqaýynyń qatysýshysy, júldeli ekinshi orynnyń ıegeri "Tańǵy Habar" baǵdarlamasyna suhbat berip, eldiń kókeıindegi birneshe suraqqa jaýap berdi dep habarlaıdy Qamshy.kz aqparat agenttigi.

Kishkentaı ónerpaz baǵdarlamaǵa anasymen birge qonaq bolyp kelgen. Sol jerde jýrnalsıterdiń birneshe suraqtaryna jaýap berip, óziniń eresek adamdarsha sóıleý mánerimen kórermenderdiń yqylasyna bólendi.

Ánshi balapannyń anasy baıqaýǵa qatysý úshin tórt aı boıy úıden jyraq júrýge týra kelgenin, eńbekteriniń aqtalǵanyn, balasynyń bolashaǵynan zor úmit kútetinin jetkizdi. Sonymen qatar, ol balasynyń boıyndaǵy talantyn 3 jasynan bastap baıqaǵan eken.

"Meniń birinshi oryn almaǵanym jaqsy boldy. eger men bas júlde jeńip alsam, sol ýaqytta ǵana meni maqtap, el umytyp keter edi", - degen mazmundaǵy jazba jarıalaǵan edi jas ánshi óziniń áleýmettik jelidegi paraqshasynda birer kún buryn.

Osy jazbany negizge ala otyryp qoıylǵan suraqqa Erjan tıanaqty jaýap bere aldy.

"Menińshe, ekinshi oryn alǵanym durys ta bolǵan sıaqty. Óıtkeni, birinshi oryndy alsam, sol kezde ǵana meni quttyqtap, áleýmettik jelige bir jylt etkizetin de qoıatyn. Al qazir tanymaldylyǵym artty ekinshi orynnyń arqasynda", - dedi ánshi balapan.

Al jas talanttyń anasy balasy úshin qatty qobaljyǵanyn, jany birge bolǵanyn aıtyp syr bólisti. Onyń aıtýynsha, osy aralyqta jasalǵan barlyq eńbegi belgili bir deńgeıde aqtalǵandaı.

Sondaı-aq, jas ánshi kadrda kóringen stakannyń synyp qalýyna baılanysty "Ol kolonkanyń ústinde turǵan juqa ydys bolýy múmkin" dep pikir bildirdi.

Usynǵan: Ádilet Mádenıet